A última xira do youtuber coruñés Wismichu provoca polémica polos seus contidos
xoves, 10 de marzo do 2016
Durante a xornada de hoxe en Twitter podiamos ver como o
nome dun youtuber conseguía destacar
entre a actualidade política, deportiva e televisiva que habitualmente son
tendencia, pois os medios de comunicación estaban a facer eco dunhas serias
acusacións contra o coruñés Wismichu, asegurando
que o seu espectáculo presentaba “contido sexual ante menores”, á vez que recollían
declaracións dunha nai que se sentiu agredida polo ton do espectáculo, dando
detalles sobre o mesmo que parecen moi afastados da realidade, e da que
diversos medios (prensa, radio e televisión) recolleron as súas declaracións, que non foron
contrastadas coas de outros asistentes ao espectáculo, xa que non faltaron os
comentarios de moitos seareiros de Wismichu que si acudiron ao show en Santa Cruz de Tenerife
desmentido a narración dunha muller que estaría a amosar unha indignación moi
pouco xustificada, xa que o rexistro que presentou o célebre coruñés foi
idéntico ao que usa nos seus vídeos na Rede, polo que os asistentes estaban
sobradamente informados do que ían atopar, e tal descoñecemento só podería
atribuírse á irresponsabilidade dos adultos que acompañaban aos menores. De
feito, e pese ao que publicaron algúns xornais, o espectáculo Hay un Wismichu en mi está cualificado
para maiores de 16 anos, de xeito que os menores de 16 anos deben acudir
acompañados por un adulto (que é sobre o que recae a responsabilidade).
Dende a organización tamén deixan claro que o espectáculo é unha ficción, en
ton de humor e sátira, cunha serie de gags
ao redor do personaxe de Wismichu, polo que as situacións hai que entendelas no
seu contexto, de xeito que, aínda que poida criticarse o ton ou o gusto do
espectáculo, estamos ante elementos claramente subxectivos, e as críticas dos
que se sentiron ofendidos están lonxe de ser maioritarias entre os asistentes,
como demostra o impresionante éxito que teñen as xiras de Wismichu por todo o
Estado.
Tras unha xornada moi complicada, Wismichu publicou un vídeo
no que defendeuse das acusacións, deixando claro que nin se representaron
as situacións que a principal autora das declaracións sobre a polémica (Maite
Guigou) manifesta, nin pareceu que a indignada
entendese que varias das prácticas das que critica a súa mención o que acontece
realmente é que Wismichu e os seus colaboradores están precisamente amosando
publicamente o seu rexeitamento ás mesmas.
Temos así unha polémica extraordinariamente amplificada polo poder das redes
sociais, que posiblemente quede nunha mera anécdota, aínda que os medios dos
que fixeron da mesma unha bola de neve deberían tomar nota e evitar verter
acusacións alegremente contra figuras ás que, ou descoñecen e/ou temen, por
manexarse nuns rexistros diferentes aos que están afeitos.
Resulta bastante curioso que a polémica só xurda nunha das actuacións, pois
estamos ante unha xira, aínda que en Galicia teremos que agardar varias semanas
para gozar da mesma, estando programado o espectáculo Hay un Wismichu en mi o
16 de abril na Coruña e o
17 de abril en Vigo, con dúas sesións por cidade, aínda que cómpre
salientar que xa están esgotados os billetes na sesión matinal da Coruña e na
sesión de tarde de Vigo.
Vídeo no que Wismichu deféndese das acusacións sobre o seu espectáculo