A tramitación online superou o 50% das xestións realizadas coa Administración galega
luns, 5 de agosto do 2019
A
Axencia para a Modernización Tecnolóxica de Galicia (AMTEGA) vén
de facer balance da aceptación do servizos dixitais da
Administración autonómica entre a cidadanía, poñendo o foco no
grao de implantación, na axilidade ou na accesibilidade, entre
outros parámetros. Un dos datos máis salientábeis fai fincapé na
sede electrónica, renovada hai un ano para mellorar a súa marxe uso
e concentrando no seu seo a maior taxa de xestións en liña que leva
a cabo a cidadanía galega: o
66% das usuarias e usuarios cualifica o seu funcionamento como bo ou
moi bo.
Estes
e outros datos foron recadados a través de enquisas, estes últimos
meses, e teñen a utilidade de “coñecer o seu grao de
satisfacción, recoller suxestións e definir futuras liñas de
actuación para evolucionar o funcionamento da sede”, informa
AMTEGA, engadindo que a través destes inquéritos demostrouse como
a xestión online está a consolidarse entre a poboación
galega como “a opción para relacionarse coa Administración”.
Así, entre xaneiro e xuño de 2019, máis do 50% das xestións
rexistradas fixéronse co dito formato, ben a través da sede
electrónica da Xunta ou das oficinas virtuais, ou no rexistro
electrónico.
Os
devanditos son datos recollidos no informe sobre o sistema de
indicadores do Plan de Goberno e Administración Dixital de Galicia
2020, elaborado pola AMTEGA, sendo o obxectivo (o dos ditos
indicadores) dar conta da evolución de uso e implantación dos
diferentes servizos dixitais para comprobar o nivel de adaptación ás
obrigas da Lei 39/2015, recollendo tanto información de uso por
parte de cidadáns e empresas como a nivel interno.
O
informe tamén constata o incremento por parte do empregados públicos
da Plataforma de interoperabilidade Pasaxe!, con 4,7 millóns de
consultas no primeiro semestre do ano e 64 servizos. Esta plataforma
experimentou un aumento no número de consultas de máis do 32% no
último ano.
Por
outra banda, a investigación tamén certifica que as notificacións
electrónicas, que o usuario pode recibir no móbil en lugar de en
papel a través da caixa de correo, incrementáronse máis dun 41%,
pasando máis de 137.000 en 2018 a máis de 233.800 en xuño de 2019.
Amais,
prosegue o seu espallamento o uso da sinatura dixital no
funcionamento interno da Administración e na relación con outras
administracións e entidades, que poden empregar a Sala de Sinaturas
para rubricar documentos. No primeiro semestre deste ano
rexistráronse na Xunta máis de 1,8 millóns de documentos asinados
electronicamente fronte a algo máis de 1 millón de 2018.
Lei
de Administración Dixital
Estes
e outros datos teñen gran interese en relación á Lei de
Administración Dixital de Galicia, recentemente aprobada, que pon o
foco na necesidade de derrubar barreiras entre a cidadanía e
administración, favorecendo ao máximo a súa relación a través
das novas canles. O novo marco xurídico establece a transformación
das actuais oficinas de Rexistro nunha Rede de Oficinas de Atención
á Cidadanía, nas que se prestará asistencia aos cidadáns na
xestións online, tanto na presentación de escritos,
solicitudes e documentación como na tramitación da identificación
dixital.
En
liña co anterior está a figura do funcionario habilitado, que
posibilitará que unha persoa autorizada ou un funcionario poda
realizar trámites telemáticos en nome doutra persoa. Con tal fin, a
norma establece a creación do Rexistro electrónico xeral de
apoderamentos.
Ademais,
a norma define, por primeira vez, a creación dun marco galego de
competencias dixitais, tomando como referencia o marco común da
Comisión Europea nesta materia, para que os cidadáns poidan
acreditar os seus coñecementos dixitais e mellorar as súas
competencias profesionais
En
palabras de AMTEGA, “a Administración do futuro máis inmediato
busca ter unha visión integral do cidadán, que estea no centro de
todo o proceso e que non sexa un actor máis. Conseguilo dará
resposta a demanda da sociedade de ter ao seu alcance unha
administración máis transparente, proactiva e con máis e mellores
servizos”.