A tramitación de licenzas urbanísticas axilizarase coa plataforma dixital da COAG
mércores, 8 de xullo do 2020
A
Administración autonómica formalizou este mércores 8 de xullo un
importante avance en materia de Administración Electrónica. Máis
en detalle, asinou un acordo co Colexio Oficial de Arquitectos de
Galicia (COAG) para axilizar a tramitación de licenzas urbanísticas
botando man da plataforma dixital do colexio. O convenio foi
asinado pola decana Elena Ampudia e pola directora da axencia, Mar
Pereira, acompañadas da conselleira de Medio Ambiente, Ánxeles
Vázquez, e a directora xeral de Ordenación do Territorio e
Urbanismo, Encarnación Rivas.
En
virtude desta alianza, sinalaron, “lógrase a interoperatibilidade
entre o procedemento de tramitación de traballos profesionais do
Colexio de Arquitectos de Galicia e o procedemento de tramitación de
licenzas e outras tramitacións urbanísticas das distintas
Administracións públicas a través do nodo de interoperabilidade da
Xunta de Galicia”. O acto celebrarase na sede do Colexio de
Arquitectos de Galicia, na Casa da Conga situada na Praza da Quintana
en Santiago de Compostela.
Elena
Ampudia explicou que o uso da plataforma colexial, como “gran
contedor de documentación”, garante a implantación e
desenvolvemento da tramitación telemática nas administracións de
maneira “eficiente” con independencia do grao de desenvolvemento
tecnolóxico do administrado. Engadiu que “este operativo”
ofrecerá validez legal á documentación que se incorpora nos
expedientes administrativos, e “certificará a seguridade xurídica
de todos os actos administrativos”, ao tempo que “permitirá a
redución de custos para a administración, o cliente e os
arquitectos e a redución dos prazos de tramitación e a axilidade na
concesión de licenzas”.
O
acordo, que terá unha duración de catro anos, facilitará o
fornecemento da documentación técnica dos traballos profesionais
desde o Colexio de Arquitectos ás distintas Administracións
públicas galegas interesadas, a través dos sistemas da Xunta de
Galicia. Deste xeito, a documentación técnica ligada á tramitación
de licenzas e outras tramitacións urbanísticas, a presentar polo
administrado, será directamente obtida por parte do sistema de
interoperabilidade da Xunta desde o sistema de xestión do Colexio de
Arquitectos, previa autorización dos técnicos autores e do propio
administrado, co obxecto de que sexa accesible polas distintas
administracións.
Tamén
o convenio permitirá a normalización da documentación técnica e
administrativa de carácter xeral. A documentación técnica
correspondente aos traballos profesionais obtida do sistema de
tramitación do COAG atoparase tipificada, estruturada e asinada
conforme ao modelo normalizado que o Colexio de Arquitectos se
encarga de ter axeitadamente actualizado en correspondencia coas
disposicións legais vixentes de carácter xeral.
Ademais,
ofrecerá garantía sobre a identidade e habilitación dos técnicos
redactores no caso de traballos visados e sobre a identidade e
colexiación. O procedemento de tramitación colexial inclúe estas
verificacións dos técnicos asinantes, polo que se evitará a
solicitude e xestión de documentación adicional para a verificación
por parte das diferentes administracións.