A telefonía móbil en España, entre as máis caras da UE

Sabiamos que a Internet de alta velocidade, sobre todo con feitura ADSL, tiña de cara ao usuario de a pé un custe especialmente elevado en España, pero se cadra a cousa non estaba tan clara en materia de telefonía móbil. Faltaba o de sempre: unha opinión dende fóra. Segundo a comisaria europea da Sociedade da Información, Viviane Reding, os prezos que as firmas operadoras poñen ao noso alcance no mercado son os máis altos da Unión, o que probablemente (sinala) veña dado por algún tipo de desarranxo en materia de competencia. A opinión de Reding, vertida durante a posta en longo dun informe sobre as telecos no mercado europeo, semella que ten unha base firme: o propio informe da UE, no que se puntualiza e se recorda que España reproduce en telefonía móbil unha boa parte dos mesmos males dos que xa adoecía en cuestión de ADSL: prezos medios mensuais elevados de máis.
Máis polo miúdo e centrándonos nas redes de alta velocidade, estamos a falar de 45,83 euros por unha conexión a Internet, fronte aos 36,89 de media europea.
Por certo que isto, unido a outros factores, segue a repercutir negativamente no escaso afianzamento das novas tecnoloxías na sociedade española con respecto aos parámetros da UE. A fin de contas, se hai algo do que prescindir no consumo do fogar, un consumo xa de por si fonte de preocupacións, é de aquilo do que xa se prescindía antes: a Rede. Consecuencia: a Internet en España avanza como deixándose levar, a desgana, estando neste intre a penetración da banda larga no 20,2%, dous puntos máis ca hai un ano, e dous puntos por debaixo da media europea. Con todo, a cousa é diferente no eido da Internet móbil, malia os seus prezos elevados (a oferta máis accesible anda a rentes dos 35 euros). Así, a taxa de uso desta tecnoloxía é do 25,9%, moi por enriba da media dos 27, que é do 13%. Polo que respecta ao afianzamento da telefonía móbil, cómpre sinalar que o seu medre foi firme e prolongado durante o último ano, estando neste intre arredor do 115%, un pouco por debaixo dos premidos da UE (118,9%).