A tecnoloxía 5G conta xa co seu observatorio estatal
xoves, 29 de novembro do 2018
Impulsar
unha tecnoloxía, o 5G, que se estima xere en 2025 uns beneficios
anuais de 62.500 millóns de euros, na contorna da Unión Europea,
para os sectores do motor, a saúde, os transportes e as utilities.
Este
é o gran obxectivo do Observatorio Nacional de 5G que comezou hoxe
oficialmente a súa andaina, cun investimento inicial de 1,5
millóns de euros e co apoio firme e integral da Secretaría de
Estado para o Avance Dixital, Red.es e Mobile World Capital
Barcelona, a entidade co-responsábel da
semana de actividades Mobile Week Coruña acabada de celebrar na nosa
terra. Mobile World Capital Barcelona achega nesta iniciativa
600.000 euros e 900.000 Red.es.
Segundo
se fixo saber, o observatorio terá sede compartida nas instalacións
de MWCapital en Barcelona e Madrid, e as súas actividades permitirán
“complementar e asistir a aquelas postas en marcha pola Oficina
Técnica do Plan Nacional de 5G, no seu labor de coordinación das
sinerxías público-privadas no despregue de redes e servizos da dita
tecnoloxía de telecomunicacións”.
En
termos concretos, o organismo xerará estudos e informes sobre os
novos usos da tecnoloxía devandita e o seu impacto potencial na
sociedade e a economía, buscando incentivar a colaboración
público-privada e do sector investigador. Prevese tamén que
organice un evento con carácter anual para a difusión do 5G
orientado á súa aplicabilidade en sectores produtivos. Tamén
abrollarán do observatorio xornadas, cursos e obradoiros.
Esta
iniciativa actuará en coordinación co Plan Nacional 5G e
complementará a estratexia España Nación Emprendedora avanzada o
pasado 5 de outubro polo presidente do Goberno de España.
Potencial
da tecnoloxía
Segundo
se fixo saber, a tecnoloxía 5G será o “compoñente tecnolóxico
esencial na transformación dixital”. O seu despregue será,
ademais, o empurrón definitivo para o desenvolvemento da Internet
das Cousas, a analítica da información a gran escala (Big Data),
a robótica ou a realidade virtual, cun “efecto transversal sobre a
sociedade e a economía durante a próxima década, sendo un
catalizador da atracción de investimento e panca dun crecemento
inclusivo”, explicouse.
Segundo
as estimacións que baralla a Comisión Europea, os beneficios de
introducir a tecnoloxía 5G en catro sectores produtivos (motor,
saúde, transporte e utilities) aumentarán de maneira
progresiva até chegar aos 62.500 millóns de euros anuais na Unión
Europea, no ano 2025. Ademais, explicou Red.es na presentación do
observatorio, “se se considera tamén o impacto económico da
mellora en eficiencia das cidades, os fogares e os centros de
traballo, os beneficios totais anuais esperados ascenderían a
113.000 millóns de euros”. Este proceso de medre traduciríase en
2,4 millóns de postos de traballo na UE.