A situación do noso sector discográfico ante a dixitalización, a debate nunha xornada do CCG
mércores, 8 de xuño do 2022
O
Consello da Cultura Galega vai organizar unha xornada, este 9 de xuño, sobre a
situación actual das empresas discográficas na nosa terra. Nela,
destacados expertos afondarán na pegada que están a ter os novos
formatos, soportes e canles neste sector, un proceso que reconstruíu
os modelos de negocio e o consumo e que obriga á superación de
novos e continuos retos. O
encontro A industria discográfica en Galicia está coordinado
por Xosé Ramón Pousa, é presencial pero poderá seguirse en
directo a través da web e das redes sociais da institución.
Segundo
explica o CCG sobre os porqués desta xornada, “os cambios
continuos nos formatos, a eclosión de Internet e as novas tendencias
de consumo, coa aparición de novas formas de pirataría e a
irrupción de plataformas de distribución alleas ao sector
tradicional, levaron a industria a unha crise total de vendas, co
afundimento de grandes selos discográficos e a modificación da
relación entre os creadores e o público cara a un modelo de
distribución con novos paradigmas”. Porén, engade o Consello, non
todo foi negativo, xa que a dixitalización trouxo novas
oportunidades, “de xeito que as redes favoreceron a aparición e o
éxito de grupos noveis, aumentaron a música en vivo, cara a un
contacto máis directo entre artistas e seguidores, e mesmo a ruptura
dos mercados locais para unha maior e máis rápida
internacionalización dos produtos, que xa non buscan compradores
senón usuarios”.
Segundo
engade o Consello da Cultura, estas transformacións teñen “unha
manifestación particular nos pequenos mercados, como o galego”,
onde “a simplificación e o abaratamento dos procesos de produción
musical están dando lugar ao nacemento de novos selos, a fenómenos
de autoedición promovidos directamente polos artistas e aos retos de
facer visíbeis na Rede os contidos sonoros dunha cultura musical tan
rica como a galega”.
O
programa
Alfonso
Espiño, músico e doutor en Historia da Arte, é encargado de abrir
o programa cun relatorio titulado A industria musical na
globalidade: do disco ás plataformas dixitais. Despois, Fernando
Fernández Rego, profesor e investigador en temas musicais, autor de
Unha historia da música en Galicia 1952-2018, analizará os
horizontes e perspectivas da historia da música gravada na nosa
terra. A xornada continúa pola tarde con dúas mesas redondas. Unha
delas moderada polo pianista, e membro do Plenario do CCG, Alejo
Amoedo, e na que Maritxu Alonso de Uterzine, Josiño Carballo de
Ernie Records e Segundo Grandío de Casa de Tolos falarán dos retos
para produtoras e editoras discográficas galegas no panorama global
contemporáneo.
Na
segunda das mesas, o xornalista Santi Montes modera a Manuel Alonso
de Músicas ao Vivo, a Michel Valiña da Asociación Distant Sounds e
a Jordi Lauren de PlayPlan Cultural que afondarán nas feblezas,
fortalezas, resistencias e esforzos para sacar adiante a produción
discográfica galega.