A segunda misión do Clúster TIC asenta os alicerces de novos pactos de colaboración con Colombia, Ecuador e Portugal
venres, 19 de xuño do 2015
Os
días pasados, tal
e como anunciamos dende Código Cero, desenvolveuse da man do
Clúster
TIC Galicia un programa de actividades destinadas a estreitar
relacións empresariais entre o noso sector tecnolóxico-dixital e
firmas, entidades e institucións da outra beira do Atlántico.
Falamos da segunda Misión Comercial Inversa, unha iniciativa para
abrirmos negocio en Colombia e Ecuador, e tamén nun país que nos
toca ben de preto dende tódolos puntos de vista: Portugal (a través
do TICE.PT). A nova Misión desenvolveuse ao longo de catro días, e
o Clúster TIC brindou aos seus integrantes a oportunidade de coñecer
a situación e as estratexias que se están a executar nestes países,
as necesidades detectadas e os avances logrados en materia de
innovación e nas TIC.
De
xeito complementario, as nosas empresas e entidades puideron amosar
en detalle os seus proxectos e potencialidades, así como produtos e
servizos xa dispoñíbeis e que poden ser acaidos para as necesidades
específicas dos convidados internacionais.
A
dirección do Clúster TIC Galicia tamén aproveitou para dar conta,
en clave colectiva, do seu ecosistema: un tecido empresarial de
“grandes integradores e exportadores”, con PEME especializadas
con produto, con 5 centros tecnolóxicos e con máis de 2.290
empresas TIC, ao que cómpre engadir
colaboracións internacionais con outros clústeres, como é o caso
de Portugal, Alemaña, Reino Unido e Suecia. “Todo isto”, fixo
saber a entidade galega, “permítenos desenvolver a nosa propia
estratexia de especialización que baseamos en tres eixos principais,
o Goberno Electrónico, no
que potenciamos o desenvolvemento das Cidades Intelixentes, a saúde,
a educación, o transporte e a participación; a Intelixencia
Artificial para fortalecer o traballo na intelixencia das bases de
datos, o descubrimento de patróns e a simulación de procesos; e a
Internet das Cousas para xerar oportunidades na comunicación
integral no fogar e na saúde, a fábrica do futuro, a loxística
internacional e o coche conectado”.
O
Clúster tamén lembrou que representa a un sector que xera xa máis
de 15.000 empregos estábeis e de alta cualificación de Galicia.
Por
certo que o desenvolvemento da segunda Misión tamén deu cabida á
presentación perante os representantes internacionais do proxecto
Coruña Smart City, que acolleu (entre outras cousas) unha
demostración práctica de datos recollidos en tempo real na contorna
urbana da cidade. Tamén se achegou luz sobre os avances dados en
servizos como o sistema de rego, o consumo enerxético, o transporte
urbano ou a información de lecer e turismo. Asemade, fíxose saber
que o gran obxectivo de Coruña Smart City é “conseguir unha
cidade líder en benestar e calidade de vida, con máis e mellores
oportunidades para o seu desenvolvemento económico e sustentábel”.
Na
segunda Misión tamén participaron os centros nosos integrantes do
tecido investigador TIC, como o Centro de
investigación en Tecnoloxías da Información e a Comunicación –
Universidade de Vigo (AtlantTIC);
a Fundación Pública Galega Centro Tecnolóxico de Supercomputación
de Galicia (CESGA); o Centro de Investigación en Tecnoloxías da
Información e das Comunicacións – Universidade de A Coruña
(CITIC); o Centro Singular de Investigación en Tecnoloxías da
Información – Universidade de Santiago de Compostela (CiTiUS); e o
Centro Tecnolóxico de Telecomunicacións de Galicia (Gradiant), que
amosaron as súas principais liñas de investigación, as
colaboracións empresariais e os resultados obtidos nos mercados
europeos. Amais, nun plano máis específico, expuxeron os seus
avances en materia de sanidade, motor, intelixencia artificial,
enxeñaría de datos, robótica, seguridade e sociedade dixital.
Pola
súa parte, os representantes americanos compartiron coas empresas e
entidades galegas un completo panorama de oportunidades de medre e
colaboración. Segundo fixeron saber, o crecemento do sector do
software e TI na contorna latinoamericana foi dun 177%, e estímase
que Colombia liderará esta tendencia alcista. A compra de alta
tecnoloxía por parte do goberno, o incremento do consumo entre a
cidadanía e a alta poboación existente xeran múltiples
oportunidades de negocio. De especial mención as solucións
industriais verticais en enerxía, saúde, enxeñaría e as Cidades
Intelixentes.