A sede viguesa da Deputación acollerá unha xornada coas principais produtoras e creadoras de contidos do Estado
mércores, 13 de decembro do 2023
Vigo
converterase o vindeiro 20 de xaneiro no epicentro do novo
audiovisual: das novas propostas, dos novos formatos, das novas
canles e das novas linguaxes. Así
o fixo saber esta mañá a vicepresidenta primeira
da Deputación de Pontevedra, Marta Fernández-Tapias, na
presentación da xornada Conecta+, un evento no que as principais
produtoras, plataformas e creadoras de contido do Estado debaterán e
intercambiarán experiencias con creadoras e creadores audiovisuais
galegos.
Conecta+
enmárcase na iniciativa Conecta Lab, programa impulsado pola
Deputación xunto con CREA, a Axencia Galega de Industrias Culturais
(AGADIC) e a única entidade española especializada na xestión de
dereitos de autor de medios audiovisuais (DAMA), para” acompañar,
impulsar e promover seis proxectos audiovisuais emerxentes de
proxección”. Cinco destes proxectos daranse a coñecer a comezos
de xaneiro entre as máis de 200 persoas que se presentaron á
convocatoria do programa, aberta a finais de outubro e pechada o 30
de novembro; o sexto será elixido polas produtoras e creadoras de
contidos entre as e os participantes inscritos na xornada Conecta+
que acollerá a sede da institución provincial en Vigo o 20 de
xaneiro.
Fernández-Tapias
remarcou a “boa acollida da convocatoria do programa Conecta Lab,
con máis de 200 proxectos presentados, un 40 % deles liderados por
mulleres e un 30 % en lingua galega, que son a proba real de que
nesta provincia hai un gran talento creativo ao que debemos e
queremos apoiar”.
A
vicepresidenta adiantou que, entre o 19 e o 29 de abril de 2024, a
Illa de San Simón acollerá as seis creadoras e creadores
seleccionados para participar no programa, que traballarán e
convivirán nunha residencia e laboratorio creativo a carón de
recoñecidos profesionais do audiovisual. “Serán dez días de
moito traballo, con clases, xornadas profesionais e encontros
transfronteirizos que servirán, ademais, para tender pontes co
sector audiovisual do Norte de Portugal”.
Na
edición de Conecta Lab, que se organizou este ano, participaron
profesionais como Óliver Laxe, Álvaro Gago, Iziar Bollaín, Celia
Rico, Carlos Marqués-Marcet, Mikel Rueda, Laura Sarmiento e Fernando
Franco.