A sede electrónica de Pontevedra abre as súas portas con 42 entradas
xoves, 3 de marzo do 2016
Como xa anunciabamos
onte dende Código Cero, co arranque deste mes
de marzo comezaba tamén a súa andaina a sede
electrónica do Concello de Pontevedra, que o
mesmo día 1 de marzo xa arrincaba a ter peticións e suxestións,
así como tamén se estreaba por parte dos cidadáns para facer os
seus trámites. Así, nesa
mañá a páxina rexistraba 42 accesos na súa
parte privada tanto de empresas como de particulares, que
solicitaron, entre outras cousas, a instalación de lombos na rúa
dos Soutos.
E indo ao obxectivo da sede, nela
pódense facer trámites, especialmente, os vinculados co servizo de
tributos amais de recompilar toda a información dos procedementos
habituais que os cidadáns requiren da administración local:
trasladar información ao Rexistro, solicitude de volante de
empadroamento, domiciliación de recibos… Durante as vindeiras
semanas irase introducindo a páxina para poder pagar tributos ou
facer solicitudes de carácter urbanístico, entre outros.
Cómpre engadir que grazas a esta
nova ferramenta, os cidadáns disporán dunha parte privada á que
pode acceder calquera veciño para coñecer a información que o
Concello posúe del: pagamento de tributos, recibos pendentes,
unidades fiscais… Para poder acceder a esta parte privada é
preciso ter unha destas tres vías de acceso: DNI electrónico,
certificados oficiais ou ben contrasinal (que se pode solicitar ante
o Rexistro Xeral Municipal con fotocopia do DNI).
A sede municipal tamén ten unha
páxina de transparencia na que se poden consultar informacións
obrigadas pola Lei de Transparencia como: a oferta de emprego
público, o perfil do contratante, o taboleiro de anuncios, a
normativa municipal e os seus impresos...
Á sede pódese acceder dende o
enderezo mesmo
ou a través da páxina
principal do Concello de Pontevedra, nunha
fiestra situada na parte superior.