A rede social galega Vituin amosa nova feitura e servizos
martes, 11 de marzo do 2014
Os responsábeis de Vituin,
plataforma social galega de
cuxa posta en marcha falamos en Código Cero a comezos de 2013,
veñen de informarnos dunha serie de actualizacións no seo da dita
rede, traballos que atinxiron a múltiples eidos: formato, deseño e
ferramentas, ao que cómpre engadir un bo número de servizos. Isto
materializouse en novidades como a aplicación de seu para
móbiles con Android , que se acompaña das
respectivas versións para dispositivos iOS e para Windows Phone.
Asemade, houbo melloras importantes de deseño con respecto á web
inicial, apostándose agora polo visual dun xeito moito máis claro.
Vituin, cuxa raizame colleu corpo a finais de 2012
(os seus responsábeis materializaron finalmente unha arela
compartida de crear unha rede social “xenuinamente galega”), non
só é distintiva e particular só por ser galega, aínda que tamén,
senón pola vontade que amosa de situarse a contrapelo dos intereses
económicos e controladores de masas de boa parte das redes sociais
ás que temos acceso na actualidade, informan os seus impulsores.
Ademais, ao seu xuízo unha boa parte destes
servizos 2.0, engaden, “négannos como país”. E explican ao
respecto: “Non sería a primeira vez que estas redes sociais nos
utilizan sen o noso consentimento, con fins máis que dubidosos e
escuros”. Para achegar unha alternativa real e útil a estas
estratexias de control, que ademais sexa unha alternativa galega, é
para o que xurdiu Vituin, precisamente, “unha ferramenta
alternativa que abre un novo vieiro para a lingua e a idiosincrasia
propias como pobo na que todas e todos poidamos ser protagonistas”.