A profesora da UDC Laura Castro mostra as claves da divulgación TIC en Madrid
venres, 7 de febreiro do 2020
A
profesora
e investigadora da Universidade da Coruña Laura Castro, actualmente
coordinadora do Grao en Enxeñaría Informática na Facultade de
Informática da UDC, participou esta mañá no I Congreso
Internacional de Comunicación y Redes Sociales en la Socieda,
celebrado na Complutense de
Madrid, onde falou da súa experiencia como divulgadora
científica no programa Galicia por Diante da Radio Galega.
Como
lembraremos, entre os meses de setembro de 2018 e xuño de 2019, o
programa matutino que presenta o xornalista Kiko Novoa e dirixe Xosé
Valiñas, incluíu entre as súas seccións divulgativas unha sobre
redes sociais, que contou coa doutora Laura Castro como experta de
referencia. Esta colaboración achegou ao gran público, semana a
semana, diferentes aspectos das novas tecnoloxías no contexto das
redes sociais, e sempre en relación con temas de actualidade. Así,
durante a tempada pasada, Laura Castro explicou desde o concepto de
algoritmo, a identificación de actividades constitutivas de
ciberacoso, ou a propiedade intelectual do que subimos a
Internet, até a importancia da diversidade ou a visibilidade das
mulleres no mundo da creación de software e tecnoloxía.
Esta
primeira edición do Congreso Internacional de Comunicación y
Redes Sociales en la Sociedad de la Información, que ten lugar
na Facultade de Ciencias da Información da Universidade Complutense
de Madrid, é un evento que, en palabras da súa organización,
pretende “explorar a influencia, alcance e impacto das redes
sociais en diferentes ámbitos da sociedade da información",
así como os seus “beneficios, desvantaxes, perigos e virtudes”.