A política e a COVID centraron a loita das plataformas anti-fake news nos últimos 4 anos
mércores, 10 de xaneiro do 2024
A desinformación
auspiciada polo mal uso das redes é un dos temas de traballo e
investigación dos profesores da Facultade de Comunicación Mabel
Míguez e Alberto Dafonte, coordinadores dun libro que recolle os
principais resultados do proxecto de investigación, financiado polo
Ministerio de Ciencia e Innovación, Narrativas digitales contra
la desinformación. Estudio de redes, temas y formatos en los
fact-checkers iberoamericanos.
Entre as principais conclusións deste traballo
figura a constatación dun medre imparábel de noticias virais
baseadas en falsidades e difundidas a través das redes sociais e das
aplicacións de mensaxería. Trátase, din, “dunha preocupación de
primeira magnitude para gobernos e institucións internacionais”,
dado que “pon en risco a estabilidade dos sistemas políticos
democráticos”.
Desenvolvido ao longo dos últimos catro anos e
centrado na actividade das plataformas de verificación de datos ou
fact-checkers de dez países iberoamericanos, este proxecto
do grupo Sepcom permitiu constatar que a política é “o eixe
fundamental arredor do que xiran os contidos” producidos por estes
verificadores, centrando preto do 40% das súas publicacións, como
sinala Míguez. Ao mesmo tempo, explica, a infodemia xerada
pola COVID-19 converteu a saúde noutra das temáticas centrais
destas plataformas no período analizado.
Publicado por Comunicación Social, o libro
Narrativas digitales contra la desinformación. Verificación de
datos y alfabetización en la sociedad digital presenta,
dun xeito divugaltivo, os principais resultados deste proxecto, xunto
coas achegas de expertos e expertas de diferentes universidades
españolas, da Michigan State University e da Universidad Católica
de Chile.
Tras un primeiro bloque centrado nun fenómeno
que, como explica Dafonte, engloba “toda aquela información falsa,
imprecisa ou enganosa presentada e promovida coa intención de facer
un dano público ou con ánimo de lucro”, a segunda parte do libro
recolle os resultados da análise das estratexias de distribución de
contidos das 17 plataformas de España, Portugal e América Latina,
acollidas á International Fact-Checking Network (IFCN). Este estudo
constata que o “volume de desinformación” que xera “o día a
día da actividade política” nos diferentes países fai desta,
como sinala Míguez, o principal eido de traballo destas iniciativas,
representando preto do 40% dos contidos que publicaron en Facebook e
Instagram en 2021. Non obstante, a pandemia converteu a saúde na
segunda temática máis relevante nestes anos, mesmo para plataformas
ata entón “orientadas case en exclusiva á verificación de
contidos de tipo político”, protagonizando boatos que “circularon
por varios países, relacionados sobre todo coas vacinas”.
O libro detense tamén no uso que os fact-checkers
realizan das diferentes redes sociais, sendo X, a antiga Twitter, a
máis empregada. Neste punto, outra das cuestións detectadas foi
que, a raíz, da COVID-19, estas plataformas “incrementaron moito a
súa actividade en redes sociais”, o que provocou que “as súas
comunidades de seguidores aumentaran tamén dunha maneira moi
significativa”, destaca Míguez. Pola contra, isto non se traduciu
nun aumento significativo “das interaccións que conseguen coa súa
actividade, que seguen sendo limitadas”.
O proxecto abrangueu tamén o estudo do uso que
realizaban de servizos de mensaxería como WhatsApp ou Telegram, que
se teñen convertido “nunha das principais vías de difusión de
desinformación”, así como a produción de contidos audiovisuais
para redes sociais.
A terceira parte do libro aborda diferentes
“contextos de desinformación”, relacionados cos ámbitos da
saúde, o feminismo e o discurso do odio xerado contra a comunidade
chinesa durante a pandemia, mentres que a última céntrase na
importancia da “alfabetización mediática” fronte a esta
problemática.
A alfabetización mediática foi outro dos eixes
dun proxecto no que se inseriron accións como o deseño dun recurso
educativo aberto, dispoñíbel no repositorio Procomún, no que
presentan unha serie de vídeos e unidades didácticas dirixidas a
alumnado de secundaria.