A plataforma mundial Code.org xa conta co apoio dos ex-presidentes do Goberno
mércores, 11 de agosto do 2021
Os
ex-presidentes do Goberno Felipe González, José María Aznar e José
Luis Rodríguez Zapatero mostraron
o seu apoio á iniciativa Code.org, sendo Mariano Rajoy o máis
recente en incorporarse a esta iniciativa para promover no mundo o
pensamento computacional, a programación, as profesións STEM e, en
definitiva, un tipo de emprendemento máis baseado na información e
máis sustentábel.
En
España, amais dos devanditos, xa se sumaron a Code.org, entre
outros, o presidente de Telefónica, José María Álvarez-Pallete, a
directora executiva de Asti Mobile Robotics Verónica Pascual, a
xornalista Sonsoles Ónega, ou a compañía ITP Aero do Grupo
Rolls-Royce.
A
nivel internacional, fixérono persoeiros tan destacados como os
políticos Barack Obama e Justin Trudeau, ou os emprendedores Jeff
Bezos (Amazon), Susan Wojcicki (YouTube), Mark Zuckerberg (Facebook),
ou Bill e Melinda Gates (Microsoft).
Code.org
é un movemento global impulsado por grandes personalidades, que
promove a aprendizaxe da linguaxe da programación en idades
temperás. Un movemento inclusivo, con foco nas mulleres, que achega
contidos formativos gratuítos traducidos a máis de 60 idiomas.
En
palabras de Mariano Rajoy, “Code.org é un movemento mundial que
ten como obxectivo fomentar a linguaxe da programación, promovendo
que os nenos estuden a programación como no seu día estudabamos o
inglés, dous presupostos básicos para ser mellores no mundo no que
vivimos. É importante que aínda que non sexamos programadores,
comprendamos e entendamos a linguaxe da programación”.
E
engade: “No mundo, ao longo da historia, houbo toda sorte de
revolucións que ao final deron lugar a maiores niveis de benestar e
progreso. Hoxe en día, a linguaxe da programación é unha nova
revolución, e todos aqueles que saiban aproveitala verán como
mellora o seu benestar, á vez que progresa o mundo no que vivimos”.
Hadi
Partovi, director executivo (CEO) e fundador de Code.org, analiza
positivamente a nova incorporación do ex-presidente galego, que fai
medrar a presenza da organización en Europa: “Cremos no poder
transformador que supón a unión de forzas do sector público,
privado, institucións, personalidades e referentes sociais. Por este
motivo agradecemos a implicación de Mariano Rajoy para sumarse a
outros referentes globais, co obxectivo de sensibilizar á sociedade
sobre a importancia da aprendizaxe do pensamento computacional a
idades temperás; derrubando calquera fenda de xénero, salarial ou
social que puidese existir a través da sensibilización, as
políticas públicas, a formación e os contidos. A revolución debe
ser inclusiva e xusta”.
Poñendo o foco nas escolas
Code.org é unha organización sen ánimo de lucro dedicada a expandir o acceso ás ciencias da computación nas escolas, e a incrementar a participación de mulleres novas e estudantes de grupos subrepresentados. A súa misión é “que todos os estudantes, en todas as escolas do mundo, teñan a oportunidade de aprender ciencias da computación como parte da súa educación básica”.
O ex-presidente Mariano Rajoy protagoniza o último vídeo en apoio a Code.org