A plataforma galega Fenix incorpora módulo de sinatura manuscrita
xoves, 21 de xullo do 2016
A firma
galega SIVSA presentou este verán unha novidade importante relativa
á súa plataforma Fenix (xestión clínica na nube). Trátase,
máis polo miúdo, dunha nova funcionalidade a engadir ao bo número
de aplicacións cos que xa conta a plataforma: o módulo de sinatura
manuscrita. Segundo informa a empresa, esta funcionalidade está
operativa dende este mes de xullo e con ela achégase a posibilidade
de facermos consentimentos informados coa seguridade (técnica e
xurídica) que implica o feito de seren manuscritos. A inclusión
deste novo servizo responde á política de Fenix relativa á
seguridade da información clínica, a LOPD e o cifrado de datos.
Con esta nova
funcionalidade, achegada grazas á colaboración de SIVSA coa firma
catalá ValidatedID, garántese que as partes non podan manipular o
documento nin acceder aos datos biométricos. Con este novo módulo
SIVSA pretende “afianzar a confianza que depositan os clientes de
Fenix, dando robustez e fortalecendo o signo de identidade da
plataforma, que é a seguridade e a información”.
Como recordaremos, Fenix
é un software de xestión clínica na nube especialmente pensando e
optimizado para médicos e clínicas de pequenas dimensións. A
plataforma foi desenvolvida por SIVSA,
empresa galega referencial en solucións informáticas para a saúde,
con máis de 25 anos de experiencia e presenza en máis de 30
hospitais en seis países diferentes. Con Fenix, informan os
responsábeis de SIVSA, podemos controlar e axilizar de maneira
rápida e intuitiva los procesos que se levan a cabo nas clínicas.
Todos eles son centralizados en Fenix, dende a chamada para solicitar
unha cita até a facturación dos servizos (tanto ao propio paciente
como a unha aseguradora).