A páxina web de Terras de Burón, premiada pola Deputación de Lugo
xoves, 2 de setembro do 2021
O
presidente da
Deputación de Lugo, José Tomé Roca, presidiu este xoves 2 de
setembro, no Pazo Provincial, o fallo dos segundos premios á
hostalería e ao turismo da provincia. Na categoría Lugo
Cambia ao Turismo Lucense o xurado distinguiu ao Xeoparque
Mundial Montañas do Courel; a web Terras de Burón; a Aldea de
Turismo Rural O Mazo, no Courel e o Concello de Viveiro; e na de ...E
para comer, Lugo á gastronomía lucense gañou a Asociación de
Criadores da raza Porcina Celta (ASOPORCEL).
Estes
galardóns teñen como obxectivo recoñecer publicamente “o
traballo e a dedicación das distintas empresas, persoas,
institucións ou entidades a favor do desenvolvemento, do fomento e
da promoción turística provincial, a traxectoria profesional e a
posta en marcha de actuacións innovadoras e exemplares que teñan
unha repercusión positiva no ámbito do turismo ou da gastronomía
lucense”.
Os
premiados, máis en detalle
Na
categoría Lugo Cambia ao turismo lucense, o xurado acordou
distinguir a catro proxectos turísticos e entidades da provincia en
función duns méritos e características propias que axudan a
promover un turismo de calidade na provincia. Son as seguintes:
- O
Xeoparque Mundial da UNESCO Montañas do Courel resultou recoñecido
polo seu proxecto baseado no patrimonio xeolóxico de relevancia
internacional, a posta en marcha de iniciativas de xeoconservación e
divulgación, e o impulso do desenvolvemento económico e cultural a
través do turismo xeolóxico.
- A
páxina web Terras de Burón (www.terrasdeburon.es/es/),
impulsada polos concellos de Ribeira de Piquín, Negueira de Muñiz e
A Fonsagrada, foi premiada polo xurado pola súa labor de fomento e
promoción turística deste territorio da Montaña lucense. Esta
páxina e as súas redes sociais adáptanse ás novas tecnoloxías e
integra as TIC (Tecnoloxías da Información e a Comunicación) na
experiencia turística.
- O
Concello de Viveiro resulta premiado polo seu proxecto Viveiro
ante o Berce, unha iniciativa turística que se celebra época de
Nadal “cun importante impacto no municipio pero tamén na
provincia”, salientou o xurado.
- A
Aldea de Turismo Rural O Mazo, no Courel, recibe o galardón ao
turismo lucense por desenvolver iniciativas singulares en Galicia
tras a recuperación dun espazo de turismo rural de 2 hectáreas de
terreo e de infraestruturas que estaban abandonadas.
Polo
que respecta á categoría ...E para comer, Lugo á gastronomía
lucense, foi galardoada a Asociación de Criadores da raza
Porcina Celta (ASOPORCEL) polo seu traballo de recuperación e
conservación da única raza porcina autóctona de Galicia,
predominante a primeiros do século XX, pero que pasou a ser unha
actividade residual.
Os
premios Lugo Cambia ao turismo lucense e ...E para comer,
Lugo á gastronomía lucense teñen un carácter honorífico e
consistirán na entrega dun diploma acreditativo e dun agasallo que
nesta ocasión será unha peza de artesanía tradicional da provincia
de Lugo de Gundivós. O día 27 de setembro, Día Mundial do Turismo,
está previsto a celebración dun acto de entrega das distincións no
salón de actos do Pazo de San Marcos.
Na
primeira edición destes galardóns, celebrados o ano pasado, foron
recoñecidos o Concello do Vicedo, a asociación de desenvolvemento
rural Serra do Courel e a Fundación Uxío Novoneyra, co premio
Lugo Cambia ao Turismo Lucense; e a aplicación móbil Xantarda
e o restaurante Cantábrico da Fonsagrada, con ...E para comer,
Lugo á gastronomía lucense.