A páxina da CRTVG ofrece novos xogos de OQO Filmes
luns, 19 de decembro do 2011
A páxina web de CRTVG vén de reforzar os seus contidos para os máis cativos,
e faino botando man dunha serie de interesantes e divertidos videoxogos do selo
galego OQO Filmes. Máis polo miúdo,
trátase de tres propostas relacionadas coa serie de debuxos animados Contos
do Camiño: as aplicacións Crebacabezas,
Choiva de ladrillos e Aforcado, tres
xogos xa dispoñíbeis no apartado Infantil
da páxina web da CRTVG.
Punto por punto, Crebacabezas é un xogo de habilidade que consiste en retarnos a
crear unha figura dun debuxo de fondo, usando diferentes pezas emprazadas á
esquerda da pantalla. No segundo dos xogos teremos ante nós unha tarefa de peso
e de gran importancia: a de construír un fogar que resista aos embates do lobo,
estando prohibido empregar paus ou pallas (a cousa é centrarse nos ladrillos).
Polo que atinxe ao Aforcado, dicir
que se trata do clásico xogo de adiviñar unha palabra, neste caso ligada aos
nomes dos animais.
Segundo informa a corporación galega e reflicten medios como a web de
AGAPI, a sección Infantil na web
da CRTVG púxose en marcha en xullo deste ano “e estase a consolidar como un referente para o público infantil en
galego”. Ofrece a posibilidade de volver gozar de series xa emitidas na TVG2,
como Doraemon, Contos do Camiño ou A Tropa de Trapo; libros recomendados
pola asociación Gálix; cancións; audiocontos interpretados por voces coñecidas
da radio e da televisión pública galega, definicións e xogos.