A palabra #galega foi a segunda máis usada do Twitter na xornada do venres
luns, 20 de decembro do 2010
O segundo
asalto para situar a nosa lingua entre os temas máis salientables da
xornada do pasado venres saldouse con 1.800
twits pouco antes das 20.00 horas, o que se traduce na consecución dun
posto máis que salientable para o termo #galega:
o segundo do ranking, só por detrás
do tema promovido nesa xornada, que era Android. Isto quere dicir que grazas á
achega colectiva de usuarios galegos de Twitter conseguiuse situar á nosa
lingua entre os trending topics da
dita rede social, que é unha maneira coma outra calquera de designar aos temas
estrela.
A iniciativa, que veu da man de Galegolab e
de Radiodifusión, foi como dixemos a segunda convocatoria dunha cita colectiva
previa, ámbalas dúas dirixidas a promover e prestixiar a nosa identidade nas
redes 2.0.
No que se refire a números, os logros deste último
asalto, de seguro que non o derradeiro, son máis que salientables: acadáronse
1.729 mensaxes coa palabra galega, escritas por case 300 persoas que foron quen
de poñela no máis alto da rede social.
Como se dixo, a iniciativa buscaba divulgar a lingua galega entre os 250 millóns de usuarios que conforman a comunidade de Twitter, “nomeadamente os episodios que levaron á execución do mariscal Pardo de Cela e as experiencias vitais de Ánxel Casal e Isidro Parga Pondal como exemplos de compromiso á vez que dar visibilidade, especialmente no Brasil, da problemática da lingua galega”, informa Galegolab.org.