A operadora galega Ocean´s abre tenda en liña
mércores, 5 de agosto do 2015
Ocean´s segue adiante comunicando
novidades (sendo unha das máis salientábeis a
vindeira inclusión da tecnoloxía 4G entre os seus servizos) e
esta semana púxonos ao tanto da apertura da súa tenda en liña,
activa dende o serán deste mesmo martes. A través deste recuncho de
distribución online, sinalan fontes da empresa galega, os
usuarios poderán contratar a golpe de clic e dende a mesma páxina
web “os nosos produtos e servizos”. E isto sen necesidade de
pórse en contacto coa firma a través do número de atención ao
cliente, o 1770, que, malia todo, seguirá operativo e coexistindo
coa tenda.
Nun primeiro intre están habilitadas
para a contratación en liña tanto as tarifas móbiles para
particulares (Terra) como as orientadas a empresas (Xpyme). Logo, de
xeito progresivo, iranse engadido os restantes produtos e servizos da
operadora galega.
A través da tenda online
poderán seleccionarse os distintos módulos adicionais dispoñíbeis
segundo tarifa, tales como a tarxeta multiSIM ou a ampliación da
tarifa de datos en 1GB. O punto de partida do establecemento dixital
céntrase pois nos produtos de telefonía móbil, pero a empresa
subliña que “en breve sumarase a totalidade do catálogo de
produtos, convertendo esta opción nunha ferramenta completa e
intuitiva para levar a cabo a contratación en liña de calquera
servizo Ocean´s”.