A nova investigadora do CITIC Naomi Diz Rosales, premiada pola Sociedade Española de Biometría

A alumna da Universidade da Coruña e investigadora do CITIC Naomi Diz Rosales vén de obter o premio ao mellor póster realizado por un investigador novo polo seu traballo Modelling the COVID-19 ICU occupancy with area-level random regression coefficient Poisson models, entregado pola Sociedad Española de Biometría. Este estudo modela e predí a ocupación de camas en UCI durante a pandemia da COVID-19 utilizando metodoloxía estatística de modelos mixtos e áreas pequenas.
A estudante de doutoramento do grupo de investigación de Modelización, Optimización e Inferencia Estatística (MODES) do Centro de Investigación TIC (CITIC) da UDC recibiu o premio no transcurso da XIX Conferencia da Sociedad Española de Biometría, organizado conxuntamente co VIII Encontro Iberoamericano de Biometría, realizado na Universidade de Vigo.
O traballo premiado forma parte da tese de doutoramento de Naomi Diz Rosales, dirixida pola profesora da UDC María José Lombardía e o docente da Universidad Miguel Hernández de Elche Domingo Morales.
A Universidade de Vigo acolleu a pasada semana a XIX Conferencia Española de Biometría e o VIII Encontro Iberoamericano de Biometría coa participación de investigadores de España, Arxentina, Brasil, Chile, Ecuador e países de Centroamérica e o Caribe da International Biometric Society. O obxectivo do encontro era difundir os resultados de investigación obtidos no desenvolvemento e aplicación de métodos estatísticos e matemáticos en bioloxía, medicina, psicoloxía, agricultura e outras ciencias afíns.