A nova convocatoria dos cursos CELGA volve combinar a formación presencial e en liña
luns, 14 de febreiro do 2022
A
Xunta,
a
través da Secretaría Xeral de Política Lingüística que dirixe
Valentín García,
vén de lanzar a convocatoria para participar nos cursos gratuítos
preparatorios das probas CELGA
de formación en lingua galega para os catro niveis establecidos e
que, segundo
informou o dito departamento autonómico,
volve combinar a preparación presencial e en liña. Faino
“co
obxectivo
de facilitar o acceso ao coñecemento do galego a todas aquelas
persoas interesadas”.
Tal
e como publican este
14 de febreiro o
Diario
Oficial de Galicia
e o Portal
da Lingua,
o prazo de presentación de solicitudes abrangue desde este
15 de febreiro ata o 7 de marzo e, a diferenza dos anos anteriores,
estas deben presentarse a través da plataforma
de formación
da Secretaría Xeral de Política Lingüística (e non na sede
electrónica da Xunta de Galicia).
Deste
xeito, as persoas interesadas só teñen que acceder a esta ligazón,
seleccionar o curso que desexen e cubrir a solicitude de inscrición.
Ofértanse
un total 35 cursos, 27 deles en liña (que cobren os catro niveis) e
oito presenciais (para os niveis 2, 3 e 4) repartidos entre as catro
provincias. Todos os cursos serán impartidos entre o 21 de marzo e o
12 de maio, mentres que as probas para obter as titulacións Celga
serán realizadas entre os meses de maio e xuño. Toda a información
sobre horarios e localizacións dos cursos pode consultarse no Portal
da Lingua Galega.
Novidades
Ademais
do novo proceso de presentación de solicitudes, a convocatoria deste
ano inclúe outras novidades destacábeis,
segundo informou Política Lingüística, que explica que a primeira
destas novidades é
a selección dos participantes para os cursos, que, no caso de
superar as prazas previstas para cada un deles, “realizarase
por sorteo e non por orde de entrada da solicitude”. O dito sorteo
terá lugar nun acto público o 14 de marzo ás 12,00 horas no salón
de actos do Pazo de San Roque, sede da Secretaría Xeral de Política
Lingüística.
A
continuación, a Xunta publicará no Portal da Lingua Galega a
listaxe do alumnado seleccionado para participar en cada curso, así
como a listaxe de agarda correspondente.
A
outra novidade incluída nesta convocatoria é a repartición dos
cursos só por niveis, mentres que ata o de agora se facía por
ámbitos xeográficos.