A muller emprendedora e as TIC, protagonistas do viveiro da Cámara de Comercio de Santiago en 2014
xoves, 5 de febreiro do 2015
A Cámara de
Comercio de Santiago vén de informar de novidades relativas ao seu
viveiro de empresas, a xuízo da entidade “a primeira incubadora
galega con máis iniciativas creadas por mulleres ao longo de 2014”.
En termos concretos, o programa de apoio á muller da Cámara
rexistrou 489 usuarias, 606 demandas de asesoramento, ademais de
crear 89 empresas e 35 postos de traballo asalariado durante 2014.
Precisamente a través deste programa materializouse o proxecto de
tenda en liña que constitúe unha das últimas incorporacións ao
viveiro. O establecemento virtual Mybibjoy.com
foi posto en marcha pola emprendedora Paula Calveira e consiste en
achegar á Rede moda infantil centrada no
deseño e fabricación exclusiva de babeiros.
A empresa, sinala
a Cámara de Comercio, naceu baixo a
filosofía de ser un negocio próximo e accesíbel
“que sempre atende aos seus clientes”. De
aí a súa metodoloxía cen por cen envorcada nas posibilidades da
Rede, que borra os límites espaciais de toda índole que poida haber
entre cliente e empresa. En
definitiva, “a
creación da tenda online fornece os
babeiros ao cliente final”, engade a
entidade cameral, que tamén salienta o caso da Asesoría
Medea, outra iniciativa incorporada en 2014 ao viveiro e outro
exemplo de emprendemento innovador feminino. Trátase, máis polo
miúdo, dunha compañía centrada en prestar servizos e asesoramento
a empresas e novos empresarios, cunha forte aposta polo medio
ambiente e facendo uso das novas tecnoloxías. A súa responsábel é
Lorena Pérez.