A mostra sobre as mulleres que fixeron posíbel a carreira aeroespacial chega ao Campus de Ourense
venres, 12 de novembro do 2021
A
mostra
As mulleres que nos levaron á Lúa, impulsada
pola Deputación de Ourense e a Unidade de Igualdade da UVigo, vén
de recalar no campus ourensán,
no Politécnico da cidade das Buras, onde estará visíbel até o 19
de novembro logo da súa estadía no Centro Cultural Marcos
Valcárcel. A continuación, comezará un percorrido por centros
educativos galegos.
En
concreto, a exposición pon de relevo o traballo das mulleres que hai
cincuenta anos foron claves para o éxito da misión do Apolo XI e a
chegada da primeira persoa á Lúa, mostrando polo miúdo referentes
femininos en ámbitos de futuro como a enxeñería aeroespacial
A
idea desta exposición ten como punto de partida a inquedanza do
profesorado universitario pola escasa presenza de mulleres nos graos
científicos e tecnolóxicos e a falta de referentes femininos nestas
disciplinas, así como polo éxito doutra mostra, Mulleres na
Ciencia, organizada polas promotoras desta nova iniciativa trala
declaración, por parte da ONU, do 11 de febreiro como o Día
Internacional da Muller e a Nena na Ciencia.
Na
actualidade, sinalouse na inauguración da mostra, "unha de cada
cinco persoas que traballan na industria aeroespacial son mulleres,
das que só o 15 % cursan estas titulacións, cando esta enxeñaría,
xunto coa de informática, son profesións de futuro nos ámbitos
tecnolóxicos e da innovación que, ademais, poden estudarse no
campus ourensán”.
As
mulleres que nos levaron á lúa consta de doce paneis, con
textos e ilustracións, nos que se recolle a biografía e logros do
equipo de enxeñeiras, matemáticas, físicas e informáticas que
tiñan como misión vixiar e preparar os cálculos de traxectoria,
programación dos ordenadores e mesmo a alimentación dos astronautas
que viaxaron ao espazo no Apolo XI.