A misión inversa do Clúster TIC Galicia saldouse con novas oportunidades de negocio
luns, 4 de xuño do 2018
Finalmente
a misión comercial inversa organizada os días pasados polo Clúster
TIC Galicia co obxectivo de amosar a empresas e entidades americanas
e europeas (in situ) o potencial innovador das nosas firmas, saldouse
en palabras da organización empresarial galega coa apertura de
“novas oportunidades de negocio para o noso sector”. O
Clúster lembra que as sete importadoras potenciais convidadas
“mostraron gran interese polo traballo que se está desenvolvendo
na Comunidade”.
O
obxectivo da misión non foi outro que o de fortalecer pontes de
colaboración e impulsar a actividade das nosas empresas de novas
tecnoloxías nos países da outra beira do Atlántico e, tamén, da
contorna europea. A estadía rematou o 24 de maio. Nela participaron
sete empresas punteiras nos eidos das telecomunicacións, os medios
audiovisuais, a consultoría e o desenvolvemento de software,
procedentes de Latinoamérica, Canadá, Alemaña e Inglaterra. Pola
nosa terra, o Clúster TIC contou co apoio de entidades como o Centro
de Investigación TIC, o CITIC, ou do centro
CiTIUS da Universidade de Santiago.
Durante
o evento, leváronse a cabo xuntanzas bilaterais e actividades de
traballo en rede entre os socios do Clúster TIC Galicia e as
compañías internacionais convidadas. A través destas xeiras de
traballo e de intercambio de experiencias, estreitáronse lazos
comerciais e detectáronse oportunidades de negocio.
Entre
as sete importadoras potenciais convidadas estiveron entidades con
moita bagaxe en materia de transformación dixital de negocios, como
The Server Labs (Inglaterra); Ceeq IT (Canadá), especializada na
utilización do Machine Learning ou aprendizaxe automática no
sector bancario e nas compañías aseguradoras; e GBTEC Software
(Alemaña), que conta cunha innovadora ferramenta de BPM (Business
Process Management),
denominada BIC Platform, que segundo informa o Clúster TIC Galicia,
xa se puxo en marcha como sistema de xestión automática de procesos
en administracións públicas e empresas de todo o mundo.
O
audiovisual tamén tivo un papel importante, coa presenza do director
técnico de TCS (Telecorporación Salvadoreña), a empresa de medios
de comunicación máis grande do Salvador e unha das máis
innovadoras da contorna centroamericana; Azteca Comunicaciones, que
conta coa rede de fibra óptica máis grande de Colombia e con
servizos de televisión, Internet e telefonía para máis de 900
localidades e 2.000 institucións públicas; e GoLive Entertainmen
Holding (Arxentina), cunha plataforma de OTT (Over-The-Top),
que ofrece un sistema de streaming en alta definición, apps
multipantalla e un acubillo de contidos con más de 8.000 títulos.
Na misión tamén participou a compañía Adminex (Brasil), que
ofrece solucións en administración (asesoría legal, contabilidade,
recursos humanos) a empresas que queren establecer actividades no
estranxeiro.
Segundo
explica o Clúster, o encontro permitiu tamén atopar provedores,
socios tecnolóxicos, e acadar acordos comerciais que reforzan un dos
obxectivos principais do Clúster: visualizar Galicia como referencia
en innovación tecnolóxica e I+D+i a nivel mundial e captar
influencers no sector TIC internacional. O Clúster tamén
salientou moi positivamente a participación do CITIC, o Centro de
Investigación TIC da Universidade da Coruña, cuxo responsábel de
Innovación e Transferencia Tecnolóxico, Manuel Bustabad, puxo en
valor as capacidades do centro e as súas principais liñas de
actividade en I+D+i. Tamén a xestora de I+D no CiTIUS, María
Tenorio, explicou o compromiso do centro da USC no que traballa coa
excelencia investigadora e a mellora continua na programación
científica e na procura de financiamento e impacto.