A maioría dos concellos galegos suspenden en transparencia
luns, 30 de xuño do 2014
- O estudo acompáñase dun mapa onde se informa do nivel de transparencia web dos concellos galegos
O grupo
CIDACOM da Universidade de Santiago presentou estes días un
interesante informe sobre cuestións como eAdministración ou Cidades
Dixitais aplicadas á realidade dos nosos gobernos locais, comparando
o nivel de integración destas correntes-metodoloxías nuns e noutros
e achegando datos xerais e taxas medias de implantación (en xeral a
cousa non pinta ben). O informe Transparencia
nos concellos galegos, que se acompaña dun
mapa en liña sobre o nivel de uso que os gobernos locais lles dan ás
súas webs (seleccionando España e Galicia e premendo logo en
aplicar e nas localizacións que nos interesen), indica entre outras
cousas que a maioría dos municipios galegos de máis de 20.000
habitantes suspenden no ámbito da transparencia.
Como
dixemos, detrás deste estudo atópase o grupo
Cidadanía e Comunicación (CIDACOM) da Universidade de Santiago, que
traballou nesta investigación co Laboratori de Periodisme i
Comunicació per a la Ciutadania Plural da Universitat Autónoma de
Barcelona. O seu labor inseriuse no proxecto Infoparticip@, no que
traballan tamén as universidades de Girona, La Laguna, Málaga,
Politécnica de Catalunya ou Rei Juan Carlos.
O informe, redactado polo
investigador Paulo Carlos López e pola investigadora Belén Puñal
Rama baixo a dirección dos profesores Luis Álvarez Pousa e Amparo
Moreno Sardà, conclúe que logo da aprobación da Lei 4/2006, do 30
de xuño, de transparencia e de boas prácticas na Administración
pública galega, e da recente Lei 19/2013, do 9 de decembro, de
transparencia, acceso á información pública e bo goberno, “a súa
aplicación é moi precaria e limitada”. Sobre o espectro de
indicadores sobre os que se centrou o seu labor, dicir que foron un
total de 41 en cada web local, organizados en catro bloques: Quen son
os representantes políticos; como xestionan os recursos colectivos;
como informan da xestión dos recursos colectivos e que ferramentas
ofrecen para a participación cidadá no control democrático. Entre
as conclusións figura o seguinte dato: dos 22 concellos galegos
avaliados de máis de 20.000 habitantes, a maioría non acadan o
aprobado, e ningún ten unha puntuación superior ao 75%.
Das que corresponden aos
concellos que son capitais de provincia, a de Ourense cun 44% é a
única que suspende, e Ponteareas e Marín non chegan nin tan sequera
ao 25%, porcentaxe que segundo os redactores do informe, “non só
está dentro do ética e politicamente reprobábel, senón que tamén
incumpre o legalmente esixíbel”. Encabeza a clasificación Lugo co
68%; seguida de Coruña, Pontevedra e Cambre co 63%; Vigo figura na
quinta posición co 61%, Santiago (56%) na sexta e Ferrol na sétima
(51%). Pola parte baixa, ademais de Ponteareas e Marín, figuran
tamén Carballo e Lalín, cun 34% dos indicadores validados.
O informe sinala tamén
que “en ningunha web atópase información completa sobre quen son
os representantes políticos no goberno e na oposición, e os
recursos para que a cidadanía poida contactar con eles son moi
limitados ou nulos”. No que atinxe aos indicadores sobre como se
planifica e se desenvolve a xestión, en só dúas páxinas dáse
conta da relación de postos de traballo da corporación e as
retribucións segundo as categorías, en só cinco publícase a
retribución dos cargos electores e en sete o orzamento do concello
actualizado. A investigación tamén sinala que os datos sobre os
representantes políticos, no goberno e na oposición, “ten que ser
completa, especialmente á que se refire á súa retribución”.
Asemade, tamén informa “da necesidade de revisar as rutinas na
produción de novas para evitar as malas prácticas da propaganda dos
cargos electos que ocupan os gobernos”.