A iniciativa galega Tecno-renting afianza a fórmula do renting na venda de produtos TIC
martes, 5 de maio do 2015
O
renting, unha modalidade en alza de compra ou aluguer de bens
en diferentes prazos (xeralmente automóbiles, aínda que non ten por
que), está cada vez máis indisolúbelmente ligado á Rede e ás
cousas que están (tamén) ligadas á Rede. Entre as culpábeis
disto, que son moitos, atópanse iniciativas como Tecno-renting,
un servizo en liña que se dirixe e facilitar venda a prazo de
computadores, tabletas, móbiles, impresoras, maquinaria industrial e
agrícola ou tecnoloxía LED, “todo con orixe en moitas diferentes
marcas e amosando unha ampla gama de prezos”, indican os seus
responsábeis, un grupo de emprendedores galegos que apostou forte
por aplicar a fórmula do renting ás tecnoloxías, e semella
que apostaron ben. “Nós o que facemos”, din, “é permitir aos
internautas mercar aquilo que precisan ou lles gusta e pagalo nos
meses que queiran”.
Segundo
conta Alberto Rodríguez, director comercial da plataforma, “a idea
xurdiu do noso día a día e a nosa experiencia tanto persoal como
profesional”. E explica, sobre as orixes do servizo: “A todos
gústanos a boa tecnoloxía pero, en moitos casos, non podemos
permitirnos gastarnos centos ou miles de euros, así que pensamos que
se o puidésemos pagar a prazos ou facer un renting igual que
facemos co coche, entón se cadra teriamos máis doado chegar a ese
gadget que tanto nos atrae”.
O
establecemento en liña posto en marcha por estes emprendedores
galegos, que xa está en activo atendendo aos seus primeiros
clientes, salienta tamén polos sectores de posíbeis usuarios de
tecnoloxía aos que se dirixe: practicamente todos. Así, achégase
“tanto para particulares como para empresas, autónomos,
administracións públicas e asociacións”. Ademais, destaca tamén
por ter apostado por unha fórmula de emprego “rápida e doada”.
Así, logo de ter seleccionado o obxecto que queremos a través da
web Tecno-renting.com,
eliximos en cantos prazos queremos pagalo, mandamos a documentación
solicitada e en 24/48 horas comunícannos se a compra foi aprobada.
Este
comercio electrónico abrangue como dixemos ordenadores, videoxogos,
móbiles, tabletas, maquinaria industrial e agrícola, tecnoloxía
LED, material de telecomunicacións, e en definitiva, “todo o que
podemos precisar para a nosa casa ou empresa ao alcance dun clic e
pagándoo nos prazos que elixamos”, engaden os seus impulsores.