A iniciativa Somos Paisaxe achega recursos na Rede para facermos colectivo contra o feísmo
martes, 7 de abril do 2015
Estes días soubemos da posta en marcha dunha
iniciativa chamada Somos Paisaxe con fondas raizames en dúas
contornas que non se rexeitan: a nosa terra e a nosa Rede. Trátase
dun proxecto promovido pola Fundación Galicia Sustentable
dirixido a facer fronte común para blindar o que ben podería
chamarse a nova conciencia galega sobre a responsabilidade no
paisaxe. Unha responsabilidade, ollo, que é colectiva, pero tamén
individual. Estamos polo tanto ante unha iniciativa que tanto na Rede
como fóra dela ten feitura de comunidade, e
sen desbotar ser unha fonte de divulgación. O gran obxectivo,
para que se entenda, é favorecer que comprendamos que así como
estragamos entre todos a paisaxe nas décadas pasadas, podemos
emendala e coidala tamén entre toda e todos.
O proxecto ten
web de seu e dende ela cóntase que naceu entre outras cousas
pola necesidade de achegar este reclamo: “Temos que salvagardar e
pór en valor a paisaxe”. A páxina compleméntase cunha serie de
vídeos explicativos (O
concepto da paisaxe, Contexto
para o Atlas das Paisaxes, Ecosistema,
paisaxe e territorio, etc) dende os que se nos leva da man cara
ao centro da problemática, dun xeito ben interesante e sen
complexidades conceptuais que lastren o camiño e impidan o
achegamento pleno da sociedade por enteiro ao miolo da cuestión,
incluídos o marco normativo e as estratexias sociais que se están a
desenvolver arredor dela.
Segundo comentan os seus responsábeis, unha das
grandes particularidades da iniciativa é que se dirixe a dar
acubillo e convocar a múltiples e variados integrantes,
colaboradores e participantes: nada de centrarse unicamente en
axentes especializados no estudo da paisaxe. Para isto habilitouse na
web de seu a serie Compartindo
visións, que se centra na achega de vídeos de persoas de
diferente ámbito profesional e xeográfico achegando as súas
visións sobre a cuestión que dá sustento ao proxecto. “A
intención é que todo o mundo se sinta partícipe da paisaxe”,
explican os impulsores da iniciativa, que tamén anuncian que
seguirán xuntando vídeos na plataforma tecnolóxica, un proceso que
sen dúbida recibirá impulso en canto o tempo mellore “e nos
poidamos botar de novo á rúa”, comentan.