A industria española aeroespacial loce talento e innovación en New Space (Vigo)
venres, 28 de outubro do 2022
A
segunda edición de New Space
España, organizada en Vigo pola empresa galega Alén Space,
chegou ao seu remate este venres 28 tras dúas intensas xornadas nas
que congregou en Vigo a máis de 200 profesionais e 90 empresas da
industria espacial nacional e internacional. Baixo o lema O camiño
cara ao liderado global, os asistentes puideron ver aos máis
prestixiosos representantes do sector en España falar das principais
tendencias e proxectos clave.
O
conselleiro delegado de Alén Space e organizador do congreso,
Guillermo Lamelas, destacou que agora ve “un sector cunha maior
madurez e robustez, e nos próximos anos temos que ser capaces de
marcar unha axenda propia”. Ademais, expresou o seu agradecemento a
asistentes e patrocinadores pola unión e compromiso por facer de
España unha potencia nesta industria pioneira.
A
segunda e última xornada, con 14 expertos repartidos en distintas
conferencias e mesas redondas, enfocouse no futuro do sector New
Space e nas estratexias máis salientábeis en materia de
investimento.
Na
mesa redonda Actores públicos do New Space español, moderada
por Luis Pérez Freire, conselleiro delegado do Centro Tecnolóxico
Gradiant, representantes de institucións públicas de renome no eido
da investigación, como o Instituto Nacional de Técnica Aeroespacial
(INTA), o Instituto de Astrofísica de Canarias (IAC), a Universidade
de Vigo, a Universitat Politècnica de Catalunya (UPC) e a
Universidade Politécnica de Madrid (UPM), reflexionaron sobre o
financiamento e innovación espacial en España.
En
palabras de Álex Oscoz, investigador principal do proxecto IACTEC do
Instituto de Astrofísica de Canarias (IAC), “España é unha
potencia mundial en astrofísica, pero é necesario investir en
ciencia e tecnoloxía porque xera un país saudábel”. De igual
maneira, Adriano Camps, director do laboratorio NanoSat Lab e
catedrático na Universitat Politècnica de Catalunya (UPC), tomou a
testemuña comentando que “é inescusábel ter un proxecto de país
para estar á vangarda”.
New
Space España 2022 continuou coa conferencia Un caso de éxito da
Universidade ao liderado de Miguel Ángel Molina, director de
desenvolvemento de negocio de GMV. Ao longo da súa exposición,
Miguel Ángel Molina detallou os comezos da súa compañía, desde a
súa concepción ata a súa consolidación como unha das grandes
multinacionais españolas. “Hoxe en día, abranguemos múltiples
sectores e somos capaces de controlar sistemas con máis de 400
satélites ou preparar o sistema de navegación de BMW”, salientou.
A
continuación, na conferencia A Axencia Espacial Europea e o New
Space, Miguel Manteiga, director do Proxecto Galileo de Segunda
Xeración na Axencia Espacial Europea (ESA), explicou a profunda
vinculación do sector New Space coa principal institución espacial
europea, porque “a pesar de que a xente crea o contrario, a ESA
estivo ligada ao concepto New Space desde 1975”. Ademais, como
experto en navegación e xeolocalización, Miguel Manteiga resaltou
que “por cada euro investido da ESA en a área de navegación, hai
un retorno de 40 euros”.
Como
peche do programa de New Space España 2022, representantes do Centro
para o Desenvolvemento Tecnolóxico e a Innovación (CDTI), GMV,
Indra, BeAble Capital e The Lab Ventures debateron na mesa redonda
Investimento para o impulso do New Space, moderada polo
director financeiro de PLD Space, José Manuel Rodríguez. Malia
proceder de institucións con estratexias de financiamento moi
diversas, concluíron que o retorno do investimento “é
importante”, pero “aínda máis determinante é o valor da idea
na que se está apostando”. Nesta liña pronunciouse Roberto
Ranera, socio xeral de BeAble Capital: “España xera moita ciencia,
pero está retida nos caixóns das universidades e queremos sacala de
aí”.
Esta
segunda edición de New Space España, organizada por Alén Space,
contou como principais patrocinadores con Indra e GMV, aos que se
lles uniu o apoio de institucións públicas como o Consorcio da Zona
Franca de Vigo, a Axencia Galega de Innovación (GAIN) da Xunta de
Galicia e o Centro de Investigación en Tecnoloxías de
Telecomunicación (AtlantTIC) da Universidade de Vigo; e o patrocinio
doutras empresas de referencia na industria espacial, como HISPASAT,
Alter Technology, DHV Technology, PLD Space, Satlantis, Fossa
Systems, GeoSAT, Deimos e Telespazio.