A galega Ventilatio Lab creará unha plataforma virtual para facer completas simulacións de voos con drons
venres, 22 de decembro do 2023
Galicia segue a dar pasos de xigante en materia de
drons e novidades empresariais relacionadas cos vehículos aéreos
non tripulados. Esta mesma semana puidemos saber que Ventilatio
Lab spin-off da Universidade de Santiago, definirá
unha contorna de simulación para analizar a aerodinámica e as
condicións de voo dos vehículos aéreos non tripulados (UAV polas
súas siglas en inglés).
O proxecto é unha das doce novas iniciativas
empresariais que formarán parte da quinta edición da Business
Factory Aero (BFAero), o programa de incubación, aceleración e
consolidación de empresas especializado no segmento dos vehículos
non tripulados do Polo Aeroespacial de Galicia.
Ao abeiro do proxecto Banco de probas virtual
para o estudo da aerodinámica de UAVs con aplicación no transporte
de cargas e condicións de voo, Ventilatio Lab creará unha
plataforma virtual que permitirá realizar simulacións de voo tendo
en conta as condicións meteorolóxicas locais, a orografía do
terreo e as condicións de carga e de potencia de cada tipoloxía de
UAV. “Deste xeito, este desenvolvemento terá a capacidade de
acelerar a toma de decisións do operador e valorar de forma rápida
e accesíbel se unha operación é abordable baixo unhas certas
condicións atmosféricas ou de carga ou se se debe pospoñer ou
modificar”, explican dende a spin-off.
O proxecto da USC, que foi seleccionado no
itinerario de incubación, desenvolverase no marco dunha convocatoria
altamente competitiva, na que se recibiron 144 propostas de 26
países, o que consolidou este programa como un reclamo para o
emprendemento en todo o mundo.
Ventilatio Lab, empresa de base tecnolóxica,
botou a andar a comezos de 2022 centrándose inicialmente na redución
da capacidade de transmisión de patóxenos e contaminantes aéreos
no contexto da COVID-19. Deste xeito, desenvolveron unha tecnoloxía
propia que, a través do cálculo de dinámica de fluídos, establece
as condicións de ventilación óptimas para manter a salubridade do
aire. Na actualidade, traballa tamén no cálculo das estratexias
óptimas de ventilación para o control dos niveis de radon
radioactivo en vivendas e espazos de traballo.
VentilatioLab é froito do traballo dun equipo de
investigadores da Facultade de Física da USC. Alberto Pérez
Muñuzuri, Alberto Otero Cacho e Jorge Mira Pérez, aos que se une o
economista Ramón Tubío Villanueva, son os impulsores da iniciativa.
O equipo investigador parte da súa experiencia en física de fluídos
e o estudo do seu comportamento en gran diversidade de contextos
(incluíndo meteoroloxía e oceanografía), experiencia que xa foi
aplicada con éxito ás novas necesidades de control de ventilación
tras a crise da COVID-19.