A galega Tendeus lanza Foxdirect.es

Será a partir deste mércores 20 de xullo cando a empresa galega Tendeus, especializada en comercio electrónico e situada no Parque Tecnolóxico de Galicia-Tecnópole, comece a distribución para toda España das películas e series da multinacional norteamericana Twentieth Century Fox mediante unha nova plataforma en liña. Tendeus comercializará para subscritores españois o catálogo completo de contidos a través de Foxdirect.es.
E que se poderá ver? Pois dende series de sona como Os Simpson ou Homeland até filmes clásicos, como Titanic ou Avatar, xunto con novidades como Deadpool. En total, a empresa ourensá porá no mercado a través de internet máis de 3.000 referencias, que se irán ampliando paseniño.
FoxDirect España recolle o formato de comercio electrónico empregado con éxito no Reino Unido e que permite que empresas e colectivos poidan acceder a descontos exclusivos promocionais para os seus clientes ou empregados sobre todo o catálogo de Fox Home Entertainment. Asemade, aos clientes de FoxDirect ofreceránselles produtos exclusivos, promocionais, de lanzamento, edicións de coleccionista, material de mercadotecnia e produtos especiais para os usuarios intensivos.