A galega Tagtum integra no seu sistema de antifalsificación o microchip máis reducido
venres, 18 de xaneiro do 2013
A empresa galega
Tagtum vén de presentar unha novidade importante no software de
seu do mesmo nome, desenvolvido para optimizar e intensificar a loita
contra a falsificación en calquera das súas manifestacións.
Segundo fan saber fontes da compañía, a devandita tecnoloxía foi
sometida os meses pasados a un proceso de mellora que, entre outras
cousas, implicou unha simplificación dos recursos postos en xogo. O
resultado de todo isto é a incorporación dun microchip que, a xuízo
da empresa galega, é o máis miúdo do mundo.
Lembrar que Tagtum é
unha tecnoloxía pioneira (a nivel galego pero tamén estatal e
internacional) na loita contra a fabricación e comercio de produtos
falsificados. Isto conséguese a través da incorporación-combinación
dun chip integrado polos fabricantes e un smartphone ligado ao
mesmo. A plataforma logra a comunicación entre o teléfono e o chip,
xestiona todo o fluxo de información e emite un certificado en liña
de autenticidade da peza.
O que nos presenta agora
a empresa galega é, como dixemos, unha simplificación da tecnoloxía
posta en xogo, dirixida entre outras cousas a transmitir aos
compradores a capacidade de asegurar, en calquera lugar do mundo, a
autenticidade dun obxecto. Este proceso levou a unha redución
notábel das dimensións do compoñente electrónico. Sinalar que até
o de agora, a implantación desta tecnoloxía estaba condicionada por
un tamaño mínimo de chips de 30 mm de diámetro, “o que
impedía integralos en artigos de reducidas dimensións, tales como
xoias, reloxos, estilográficas, lentes e un amplo abanico de
produtos de luxo”. Porén, iso agora mudou, segundo nos lembran
dende a empresa galega, que acadou o imposíbel: integrar un
minúsculo chip de 3 milímetros na súa app, xa dispoñibel para
teléfonos Android de forma gratuíta. Segundo engaden fontes de
Tagtum, se ao devandito “lle sumamos a posibilidade de
conectar o teléfono móbil dos clientes con toda unha serie
de novos contidos e funcionalidades ofrecidos polo fabricante por
medio do chip, estamos ante o resultado do que hoxe en día xa se
denomina a terceira revolución industrial: os artigos intelixentes”.
Segundo palabras do seu
director, Manuel Montes, “nunca unha lonxitude tan pequena
conseguiu dar un paso tan grande na loita contra a falsificación de
artigos. Iniciamos a comercialización hai poucas semanas, e tras
este avance, recibimos peticións de información desde
multinacionais do pequeno electrodoméstico en Silicon Valley até
distribuidores potenciais en Grecia”. E continúa: “A nosa
aposta por desenvolver tecnoloxía que achegue confianza no mercado
deu os seus primeiros pasos, agora é o momento no que os fabricantes
deben apostar por achegar valor engadido aos seus produtos e
diferenzas ante os seus competidores”.
Para
saber máis desta tecnoloxía e de quen está detrás dela, lembrar
que en Código Cero dimos conta hai pouco da presentación destes
recursos en Vigo, no marco da última edición das Xornadas de
Automatización Industrial.