A galega Ozona amosará en México a súa experiencia en proxectos ISO 20000
xoves, 17 de novembro do 2011
- Diego Berea, director de Consultoría de Ozona
A compañía galega Ozona Consulting, especializada en proxectos de
consultoría de procesos ITIL e ISO 20000
vén
de informar dunha nova manobra no seu proceso de internacionalización. Máis
polo miúdo, trátase da súa participación activa, os vindeiros 23 e 24 de
novembro, como relatora en dous eventos a celebrar en México: o Terceiro Foro
Internacional ITIL&IT Service Management 2011 en Monterrei e máis a
Terceira Sesión do itSMF México na capital do país. A presenza en ámbolos
encontros, sinala Ozona, sumado a outros como o
recentemente celebrado en Lisboa, non fai máis que “recoñecer a experiencia da compañía ao presentar os seus proxectos ISO
20000 a nivel internacional”.
Máis en detalle, Ozona presentaralles aos
asistentes unha análise sobre a nova norma ISO/IEC 20000:2011. O relatorio
correrá a cargo de Diego Berea, director de Consultoría da firma, que afondará na situación
actual da implantación do estándar a nivel mundial e achegará suxestións de
aplicación no seo dunha entidade da devandita norma. Asemade, amosará a
integración desta con outros estándares e máis a súa complementariedade cos métodos
ITIL.
