A galega Dos Espacios desenvolve a web dunha das firmas de froita máis importantes de Portugal

Os labores de deseño web tenden, amais de cara a unha mellora constante na estética, na usabilidade e na accesibilidade, cara a dúas grandes metas: abranguer todos os sectores posibles do social e a meirande cantidade de mercados xeográficos. Nesta liña de ampliar clientes dende os dous puntos de vista devanditos (temático e físico) e onde está a traballar a empresa Dos Espacios Internet Consulting con sede en Vilagarcía e que presenta estes días o seu novo proxecto: o desenvolvemento en Flash da nova web de Kiwi do Minho do Grupo Eurofrutas, unha das distribuidoras de froita fresca máis importantes de Europa. O novo sitio que deu a coñecer Dos Espacios inclúe catro apartados fundamentais: presentación, funcionamento e obxectivos da empresa, venda en si mesma do produto e galería de arte.
A web, especialmente coidada no seu deseño, vai dirixida cara a distribuidores e comerciantes do sector e figura xa en tres linguas distintas: portugués, español e inglés (en breve incorporarase o alemán e máis o francés).
Segundo nos informou a propia empresa galega responsable do proxecto, trátase do primeiro traballo internacional que presentan, traballo que en breve verase completado por outros desenvolvementos web que a día de hoxe están en fase de preparación e estudo. Cómpre sinalar que aínda está recente a posta en marcha da nova web da Fundación Feiral Fexdega, da que, por certo, xa falamos en Código Cero.