A galega Blusens amplía o seu mercado en Sudamérica

Blusens Corporation, a compañía tecnolóxica galega, vén de anunciar hoxe a posta en marcha de Blusens Sudamérica, unha nova filial dende a que atenderá o negocio da entidade no cono sur do continente americano: Arxentina, Brasil, Chile, Uruguai e Paraguai comercializando, tamén alí, todo o seu catálogo de produtos.
A creación desta filial, con sede en Montevideo, vén a reafirmar o carácter internacional da compañía galega, que pretende estar presente comercialmente en máis de 50 países antes de que remate o ano.
Miguel Silva, o vicepresidente executivo de Blusens e Managing Director Global Operations asegurou que o mercado latinoamericano “é un mercado en pleno crecemento” e un “piar fundamental” nos plans de expansión da compañía que, segundo Silva, “prepara xa a súa entrada en Estados Unidos o vindeiro ano”.
Asemade, a partires do vindeiro mes de xullo, está prevista a implantación da marca en México e Costa Rica onde, contando con acordos locais coas principais cadeas de distribución, será posible que se poidan comercializar na zona os dispositivos de última xeración de Blusens, incluído o Home Entertaiment Device, o vindeiro lanzamento da empresa galega.