A galega Aceluz desenvolve unha aplicación móbil para axudarnos a aforrar na factura eléctrica
mércores, 18 de xuño do 2014
Aceluz
Solucións Enerxéticas, empresa con sede na Coruña e
especializada en servizos e ferramentas avanzadas de eficiencia
enerxética, vén de anunciar o desenvolvemento de Efitime,
unha aplicación para Android e iOS que permite coñecer cada hora o
prezo da luz e deste xeito estarmos en maior e mellor disposición
para aforrar enerxía, un ben, por certo, do que cada vez hai máis
fogares e empresas excluídas (a chamada fenda enerxética,
unha brecha que medra a pasos axigantados coa crise e co incremento
do prezo dos servizos das grandes empresas do sector).
Segundo confirman os
responsábeis da ferramenta, esta responde a unha serie de demandas e
necesidades concretas por parte dos cidadáns e o sector produtivo.
Necesidades que se suman a unha situación, a actual, na que entran
en xogo “novos cambios normativos de tarificación enerxética que
provocan unha gran incerteza entre os consumidores”. Así, sinalan,
“o sistema de poxa diario é descoñecido para a maioría deles e é
difícil saber como facer un uso máis eficiente do consumo
enerxético”. Aí entra en xogo precisamente Efitime, “unha
aplicación para móbiles onde se pode consultar o prezo da enerxía
en tempo real e onde podemos informarnos das diferentes tarifas para
todas as horas do día”.
Ao fío do devandito,
cómpre lembrar que a aplicación actualízase de xeito automático
todas as noites tras a poxa enerxética para as seguintes 24 horas.
“Sabendo canto nos custa a luz a tempo real e coñecendo cales
serán as horas máis económicas do día”, explican os creadores
da aplicación, “os usuarios poderán planificar o seu consumo
enerxético programando a que hora pór a lavadora, o lavalouzas ou
calquera outro electrodoméstico”. Deste xeito, estaremos en
disposición de optimizar ao máximo o consumo da nosa factura. En
termos concretos, poderemos chegar a rentes dunha redución do 30% no
consumo mensual.
Por certo que a descarga
de Efitime é totalmente de balde e está dispoñíbel para todos os
dispositivos Android e IOS.