A galega 2Mares amosa a súa tecnoloxía no Salón Expocontact de Madrid

A empresa galega 2Mares informa que estará estes días na nova edición (a novena) dun dos principais escaparates estatais de novas tecnoloxías, metodoloxías e modelos de comunicación e atención co cliente empresarial: o Salón Expocontact´13, que se celebra os días 22 e 23 de maio en Madrid. Ao seu acubillo, 2Mares participará co relatorio Tres sorpresas ao analizar as conversas de extremo a extremo, a cargo de Enrique de Miguel iLarri, responsable da empresa galega. Asemade, tamén ten previsto participar na mesa redonda Redes sociais e ferramentas 2.0 na xestión para o cliente do futuro, xunto a outros profesionais da innovación ao servizo da xestión dos clientes nas diferentes comunidades e servizos de Internet.
Salientar que 2Mares, especializada no desenvolvemento de recursos innovadores para que as empresas optimicen e rendibilicen as súas canles de comunicación, estará no dito salón como patrocinadora de ouro, contando tamén cun stand de seu dende o que informará das posibilidades de solucións como Intellixente, un recurso tecnolóxico para escoitar a voz dos compradores dun produto ou servizo, tomándolle o pulso aos milleiros de opinións persoais que se verten na Rede sobre o devandito produto ou servizo (e avaliando a posición que ten unha empresa entre a sociedade).