A futura guía empresarial online de Ames xa conta cos datos dun milleiro de negocios
xoves, 3 de marzo do 2022
O
traballo despregado pola Concellaría de Promoción Económica e
Comercio de Ames no camiño de elaborar unha Guía de Empresas
e unha aplicación móbil que faga accesíbel, actualizada e
inmediata esta información segue a dar importantes avances. Neste
intre, de feito, xa se recolleron datos de 1.000 empresas do comercio
e hostalaría dos núcleos urbanos de Bertamiráns e do Milladoiro.
Farase unha segunda quenda de recollida de información para falar
cos propietarios/as de empresas que estaban pechadas no momento en
que tratou de falar con eles/as. En marzo farase a recollida de datos
en negocios do rural.
Esta
listaxe de empresas servirá tanto para que poida ser empregada pola
veciñanza de Ames, para buscar posíbeis empresas que lles poidan
interesar con vistas a obter un servizo, así como para que a propia
Administración local coñeza empresas que poidan participar en
procesos de licitación de servizos municipais.
O
traballo de recompilación de datos estase a realizar nun período de
tres meses. Comezou o pasado 17 de xaneiro e rematará a mediados do
mes de abril. Aínda así, todas aquelas empresas, profesionais e
negocios que agora non acheguen os seus datos, poderán facelo noutro
momento. “Trátase dun proceso de actualización aberto e continuo
no tempo”, explicou o Concello.
Como
dixemos, o resultado será unha Guía de Empresas dixital, que
estará incluída nunha aplicación móbil do comercio local e que
poderá ser consultada a través dos dispositivos da cidadanía en
calquera intre.
Na
guía proporcionaranse indicadores para a configuración dun
inventario dos recursos socioeconómicos e do seu estado e evolución
tendencial. Así mesmo, a recollida de información da enquisa valerá
para detectar as necesidades de formación, actualización ou
aplicación das novas tecnoloxías na comercialización, loxística e
difusión do tecido empresarial.