A fibra óptica de Telefónica chegará a sete parroquias de Carballo
venres, 6 de xullo do 2018
- Xuntanza do Concello con telefónica de Galicia celebrada o ano pasado
A
Axencia
para a Modernización Tecnolóxica de Galicia (AMTEGA) vén de
comunicar ao Concello de Carballo o vindeiro despregue de redes
ultrarrápidas de acceso a Internet no rural do municipio.
Segundo lle fixo saber, no período 2018-2020 está previsto o
despregue de fibra óptica en varios núcleos de poboación de sete
parroquias, co fin de equipar aos fogares e empresas residentes
nestas contornas con Internet de última xeración. Os traballos,
coma
os avanzamos estes días polo Concello de Oleiros e o
Goberno local de Teo, serán posíbeis grazas ao Plan Banda Larga
2020 impulsado pola Administración autonómica e estatal con fondos
europeos.
Este
plan, do
que falamos recentemente en Código Cero con motivo da presentación
das importantes actuacións no rural que inclúe, prevé o
despregue de redes ultrarrápidas na Galicia non urbana no devandito
período de dous anos, uns labores que serán desenvolvidos por
Teléfonica e que terán co-financiamento do Fondo Europeo Agrícola
de Desenvolvemento Rural (FEADER). O resultado será que unha parte
moi relevante das nosas vilas de pequeno tamaño e das nosas aldeas e
miúdos núcleos de poboación contarán con servizos de acceso a
Internet de máis de 100 Mbps simétricos mediante fibra óptica.
Respecto
ao fornecemento de infraestrutura e tecnoloxía ao municipio
bergantiñán, este responde, en palabras do Concello, a “unha
reiterada demanda da veciñanza a través dos consellos parroquiais
que desde a alcaldía foi trasladada xa o ano pasado á directora de
Telefónica en Galicia”, a empresa adxudicataria (precisamente) dos
ditos traballos.
Os
núcleos de Carballo que serán obxecto de despregues de tecnoloxía
FTTH (fibra óptica até o fogar) son os seguintes: Quintáns e
Vivente (Ardaña), A Ganduma, O Moucho e Vilarnovo (Berdillo), Queo
de Arriba, O Requeixo e Loenzo (Bértoa), Cances da Vila (Cances), O
Monte e Ponte Rosende (Carballo), As Torres (Oza) e Bolón e Guntián
(Sofán). O investimento realizarase entre este ano e o 2020, segundo
a información facilitada ao Concello pola Axencia para a
Modernización Tecnolóxica de Galicia.
Ademais,
con cargo ás subvencións concedidas desde o Estado, están xa en
curso actuacións que permitirán servizos de acceso ultrarrápido a
Internet en Queo de Abaixo, A Rega e O Fondal (Bértoa), Cances
Grande (Cances), e Arnados e Razo da Costa (Razo).
O
Concello lembra que na última convocatoria do Estado, publicada en
abril deste ano, achégase a maiores unha dotación de 18,5 millóns
de euros para Galicia, que permitirá que os operadores poidan seguir
incrementando a velocidade de acceso a Internet en zonas nas que non
hai servizo de redes ultrarrápidas nin previsión de dispoñer del.