A ferramenta electrónica Sophos permitirá medir a actividade científica do SERGAS
venres, 28 de marzo do 2014
A sede da Fundación Escola de
Administración Sanitaria acolle este venres unha xornada sobre a
actividade científica do Servizo Galego de Saúde. O foro contou coa
presenza da conselleira Rocío Mosquera, abrindo
a xeira de actividades e salientando as funcionalidades e vantaxes da
ferramenta electrónica Sophos, que foi desenvolvida por
Bibliosaúde en colaboración coa Subdirección de Investigación do
SERGAS. Segundo fixo saber, Sophos servirá entre outras cousas para
medir a actividade científica de todos os investigadores da
Consellería de Sanidade e do Servizo Galego de Saúde.
Segundo explicou
Rocío Mosquera, “Sophos será moi útil tanto para o persoal
investigador como para o xestor sanitario”. E
engadiu: “Aos primeiros permitiralles coñecer a súa actividade,
en que revistas se publica, as redes de colaboración que existen,
así como saber os indicadores que miden a calidade e favorecen a
autoavaliación; e aos segundos, os xestores, permitiralles
identificar grupos de excelencia, a análise da colaboración e a
detección de áreas fortes e aquelas que hai que reforzar no sistema
investigador galego das ciencias da saúde”.
Entre os relatores da xornada que
hoxe inaugurou a conselleira están a directora xeral de Innovación
e Xestión da Saúde Publica, Sonia Martínez, quen falara da I+D+i
biomédica en Galicia; Francisca Abad, catedrática de Medicina da
Facultade de Medicina de Valencia, que abordará a contribución dos
estudos métricos á xestión da investigación; e María Sobrido,
responsable de Sophos, que exporá a análise da produción
científica do SERGAS.