A feira Pont-Up Store quece motores cun completo programa de actividades e 40 emprendementos
martes, 21 de setembro do 2021
Este
21 de setembro presentáronse en Pontevedra os detalles da nova
edición da feira local de emprendemento innovador Pont-Up
Store, que abrirá as súas portas este venres 24 na praza de
España da cidade do Lérez, mostrando até o sábado seguinte “todas
as propostas de mercado que non puidemos coñecer na pasada edición”,
por mor da COVID, e unha ducia de novas empresas a maiores que
tiveron a afouteza de iniciar a súa andaina en plena crise
pandémica.
En
total presentaranse 40 empresas que destacan pola innovación e a
creatividade das súas propostas; o que se acompañará dunha
completa programación de actividades (presentacións, obradoiros,
demostracións, charlas) arredor da cultura emprendedora e, por
primeira vez, un espazo virtual denominado dixital_pontup, que
“permitirá vivir o encontro e acceder aos stands de xeito
en liña, e que continuará activo máis alá do evento”,
informaron os participantes na presentación celebrada este martes
21.
O
programa foi dado a coñecer no Teatro Principal de Pontevedra coa
participación da concelleira de Promoción Económica, Yoya Blanco
Rial; o tenente de alcalde do Concello de Pontevedra, Tino Fernández
González; o deputado provincial de Economía, Carlos López Font; o
vicerreitor do Campus de Pontevedra da UVigo, Jorge Soto Carballo; e
o director do encontro, Pedro Figueroa Dorrego, que comezou a súa
intervención salientando “a principal novidade desta edición”,
que é o devandito espazo dixital_pontup, que “supón
un paso de xigante e unha aposta de futuro para o traballo da
comunidade emprendedora galega”. Consiste, engadiu, nunha
aplicación desenvolvida por Xeométrica (empresa participante na
segunda edición do Pont-Up Store e que na actualidade pertence ao
Grupo Coterena), que foi posíbel grazas á achega de 6.000 euros por
parte da Concellaría de Promoción Económica de Pontevedra.
Segundo
subliñou Figueroa, “tras un ano tan complicado para os
emprendementos como foi 2020, estes novos tempos obrigáronnos a
repensar e innovar para xerar dinámicas positivas que motiven e
axuden a visualizar ás novas persoas emprendedoras”. Figueroa
engadiu que o espazo dixital_pontup permitirá,
entre outras cuestións, contar cunha programación propia durante
todo o ano para a realización de foros, xuntanzas, intercambios de
experiencias ou actividades sectoriais dedicadas ao novo
emprendemento; a integración no aplicativo dunha zona de exposicións
destinada a navegar por stands virtuais e interactivos que
conterán os proxectos de emprendemento seleccionados na edición e
que “permitirá visualizar unha recreación dixital e interactiva
da súa tenda, contactar en tempo real por medio de videochamadas ou
efectuar compras; incrementar a visibilidade e difusión dos
proxectos e os patrocinadores en cada evento ou actividade; e
integrar no aplicativo unha zona virtual para presentar os
relatorios, mesas redondas e outras actividades grupais que acontezan
no evento ou ben aquelas que se poderían celebrar durante todo o ano
e dedicadas a sectores concretos (alimentación, tecnoloxía,
cultura, lecer…)”.
Máis
mulleres
O
director do Pont-Up Store tamén destacou que esta edición do
Pont-Up estará “claramente liderada polo emprendemento feminino,
que supón un 55% das empresas que van dar a coñecer as súas
iniciativas”, e tamén é “decididamente sustentábel con case un
100% das iniciativas aplicando criterios de respecto ao medio
ambiente de forma transversal ou como sinal de identidade”.
Ademais, dixo, “constátase o crecemento do emprendemento radicado
en vilas e aldeas que supón xa un 40%, fronte o 60% que se asenta
nas cidades, e, entre estas últimas, Vigo é o polo emprendedor por
excelencia dentro da provincia de Pontevedra que protagoniza o 50%
das iniciativas”.
Un
fervedoiro de emprendementos
En
total van participar nesta edición 40 startups galegas; 35
serán empresas cun emprazamento de seu, e outras 5 empresas
desenvolverán actividades demostrativas na carpa. Entre elas hai un
grupo de 12 empresas con negocio de nova implantación neste contexto
actual de pandemia e unha que recunca no encontro grazas ás
innovacións aplicadas na xestión e produción da empresa. Entre as
empresas seleccionadas ao abeiro desta convocatoria salientan (entre
outras) as propostas tecnolóxicas Evourbe, que vai presentar un
sistema intelixente de xestión de estacionamento que nace co
obxectivo de revolucionar o estacionamento nas cidades, ou Vi&Go,
que lanza un proxecto de mobilidade sustentábel mediante subscrición
de motos eléctricas e intelixentes e un sistema de carga de
baterías.
Tamén
estarán presentes iniciativas tan sobranceiras como Benestar Market,
un espazo online onde comprar produtos naturais, sustentábeis
e zero waste; SmartWood,
unha ferramenta orientada á mellora da produtividade e o rendemento
das explotacións agrícolas e forestais; Weet Energy & Telecom,
unha contribución innovadora para crear novos xeitos de
abastecemento eléctrico; ou I+ADN, consultora de innovación.