A estratexia smart de Ferrol e Narón recibe 10 millóns de euros da UE
martes, 23 de maio do 2017
A
estratexia sustentábel (EDUSI) de Ferrol e Narón, un proxecto
partillado para traballar a prol do emprego e a calidade de vida da
cidadanía a través de recursos smart, vén
de acadar 10 millóns de euros a través da segunda convocatoria dos
fondos europeos FEDER 2014-2020. Esta subvención, a segunda
europea que logra Ferrol en maio, implica o pulo definitivo a un
proxecto que se artella en torno a seis obxectivos temáticos, un dos
cales se insire no eido do goberno electrónico e procura a
“reoeorganización dixital da obsoleta estrutura das dúas
administracións locais”. O obxectivo común destes puntos da EDUSI
(Estratexia de Desenvolvemento Urbano Sostíbel e Integrado)
Ferrol-Narón é camiñar cara a unha cidade intelixente, vertebrada,
que se abra ao mar e comparta servizos e estratexias de
desenvolvemento.
Ría
de Ferrol: Cidade 2020 é a denominación formal que ten a EDUSI
presentada de forma conxunta por Ferrol e Narón a convocatoria dos
Fondos FEDER 2014-2020, unha achega que abre as portas ás axudas da
Unión Europea (Fondos FEDER) para o desenvolvemento rexional,
apostando por pequenos e estratéxicos investimentos en persoas. O
plan das dúas localidades galegas abrangue seis obxectivos
temáticos: unha liña estratéxica para impulsar actividades de
valor engadido nos sectores tradicionais (Máis alá do naval); un
ámbito de traballo para potenciar a candidatura de Ferrol ao
Patrimonio da Humanidade da UNESCO mediante a rehabilitación e posta
en valor do propio patrimonio (Cidade da Ilustración); unha proposta
estratéxica para abrir Ferrol ao mar e que inclúe melloras
importantes na contorna litoral, con equipamentos como sendas peonís
ou carrís bici, amais de labores de descontaminación e de
seguimento smart da conservación do medio (Ola Mar); unha
liña de traballo para loitar contra as carencias sociais e para
optimizar a calidade da paisaxe urbana (Ferrol Mola); e un espazo
para harmonizar urbanisticamente os dous concellos, cun impulso aos
transportes sustentábeis, sobre todo a bici e o metro lixeiro
(Compacta, vertebrada e conectada).
A
maiores, inclúese un bloque de Administración Electrónica, a área
Eficiente e dixital. Con este bloque temático quérese reorganizar
dixitalmente a “obsoleta estrutura das dúas administracións
locais en aras de acadar a máxima eficiencia nun nivel
supramunicipal acorde a Lei de Procedementos da Administración
Electrónica”. Con estas actuacións daráselle prioridade ao
ámbito social e de promoción económica a través da asistencia
social e integraranse e aplicaranse algunhas funcións propias das
Smart Cities como por exemplo as paradas intelixentes.