A empresa ourensá EDISA estreará nos vindeiros meses a versión 6 de Libra
venres, 9 de outubro do 2015
No
ano 1983 abría as súas portas EDISA, a empresa con sede no ourensán
Parque Tecnolóxico de Galicia (Tecnópole),
unha factoría centrada na integración
de sistemas baseados nas últimas tecnoloxías
da información,
así como no desenvolvemento
e introdución de software estándar de xestión empresarial.
E dando un pulo cara a actualidade,
e como
xa adiantamos dende Código Cero os días pasados,
EDISA
ten entre mans o lanzamento (previsto para xaneiro de 2016) da nova
versión Libra 6, que suporá un fito
importante nunha traxectoria de case 25 anos para a
devandita plataforma tecnolóxica de xestión empresarial,
que en palabras dos seus responsábeis é xa, a día de hoxe,
“moito máis que un ERP”.
Se botamos unha ollada á
historia do software Libra, cómpre dicir que era o 3 de outubro de
2015 cando se realizaba a presentación a nivel interno, estando
prevista a presentación a todos os clientes de España entre os
meses de novembro e decembro, para finalizar no primeiro trimestre de
2016 coas presentacións nos países de Latinoamérica nos que Libra
tamén está presente.
E cales serán as
principais vantaxes que achegará a nova versión aos clientes? Pois
unha interface nova que permite personalizar os indicadores de
xestión a nivel de usuario, facer máis doado o acceso aos programas
e integrar tanto as aplicacións encamiñadas a escritorio como as
aplicacións orientadas a dispositivos móbiles ou dispositivos con
interface táctil. Outra vantaxe serán as novas ferramentas para a
explotación de datos integradas en Libra 6 e unha meirande
automatización de procesos e sobre todo integración con todos os
axentes cos que interactúa a empresa (clientes, provedores, banca,
administración pública, axencias de transporte).
Por último, informamos
agora da axenda prevista para a presentación da nova edición do
software: o martes 27 de outubro, 9.30-12.30/ Asturies (sede EDISA);
o martes 3 de novembro, 9.30 -12.30/ Vigo (especificarase lugar); o
martes 3 de novembro, 16.00-19.00/ Santiago de Compostela
(especificarase lugar); o mércores 4 de novembro, 9.30-12.30/ O
Barco de Valdeorras (Pazo do Castro); o mércores 4 de novembro,
16.00-19.00/ Ourense (sede EDISA); o martes 10 de novembro,
9.30-12.30/ Madrid (sede EDISA); o martes 17 de novembro, 9.30-12.30/
Euskadi (especificarase lugar); o martes 24 de novembro, 9.30-12.30/
Valencia (especificarase lugar); o mércores 2 de decembro,
9.30-12.30/ Sevilla (especificarase lugar); o mércores 9 de
decembro, 9.30-12.30/ Barcelona (especificarase lugar); o mércores
16 de decembro, 9.30-12.30/ Canarias (especificarase lugar). En canto
ás sedes de Latinoamérica, a presentación será ao longo do
primeiro trimestre de 2016.