A dixitalización de Galicia foi obxecto dun investimento de 1.260 millóns dende 2015

A directora da Axencia para a Modernización Tecnolóxica de Galicia (AMTEGA), Mar Pereira, fixo balance das medidas desenvolvidas durante os cinco anos de desenvolvemento da Axenda Dixital de Galicia 2020 (ADG2020), impulsada desde este departamento autonómico. Fíxoo no marco do pleno anual do Observatorio da Sociedade da Información (OSIMGA), acabo de celebrar esta fin de semana. Segundo recordou ao abeiro deste balance, investíronse dende 2015, dende o Goberno galego e o sector tecnolóxico, máis de 1.260 millóns de euros co obxectivo de avanzar na nosa dixitalización. Desta conta, máis de 400 millóns tiveron procedencia no capital privado.
A directora da AMTEGA destacou as actuacións para mellorar a conectividade do tecido produtivo con actuacións específicas para empresas do rural e os despregamentos para a extensión de redes en núcleos de menos de 300 habitantes, que, segundo dixo, “xa beneficiaron a 53.000 persoas”. E engadiu: “Desde 2018 puxéronse en marcha as primeiras medidas do Plan Galicia 5G como a posta en marcha do Nodo de Cooperación 5G ou os avances no desenvolvemento de diferentes probas de concepto con esta tecnoloxía, que no 2020 son xa máis de 30”.
Asemade, destacou que a día de hoxe a tramitación telemática superou á presencial, situándose xa nun 53,2% no 2019. Neste eido, destacou a publicación da Lei 4/2019, do 17 de xullo, de Administración Dixital de Galicia (LEDIXGA) completando o marco normativo galego para consolidar unha administración dixital “máis accesíbel e proactiva” e universalizar o uso e acceso da cidadanía aos servizos públicos dixitais. E, ao seu abeiro, deseñáronse as bases do novo marco de competencias dixitais, aliñado coas estratexias europeas na materia.
No ámbito educativo, fixo saber que “o ensino integramente dixital en Galicia posibilita que a día de hoxe 34.000 alumnas e alumnos estuden co libro dixita” e que dende a Administración autonómica “promovéronse os coñecementos STEM duplicando o número de centros que imparten o STEMBach chegando a 31 centros no curso 2019/20”. Así, dixo, “en 2019 superáronse cun ano de adianto os obxectivos fixados na Estratexia Galega para a Educación Dixital de centros eDixgal e Bacharelato de Excelencia”.
Ademais, engadiu, no marco do Plan de Inclusión Dixital impulsáronse novas iniciativas coa a colaboración de máis de 856 Aliad@s Dixitais, conseguindo achegar a tecnoloxía a máis de 90.900 galegos a través da Rede de Aulas públicas CeMIT con máis de 377.000 horas de formación planificadas.
Con respecto aos sectores estratéxicos da economía galega, Pereira puxo o foco no importante impulso recibido polos recursos turísticos e patrimoniais galegos a través das tecnoloxías dixitais co desenvolvemento do Plan Smart Turismo e a creación da Memoria dixital de Galicia, “avanzando na conformación dun fondo dixitalizado do patrimonio cultural material e inmaterial”. Tamén salientou “a importante aposta pola transformación dixital do sector primario co Programa Primare”; e o desenvolvemento, no eido agrario, de proxectos CPTi para a automatización das inspeccións das axudas da PAC e, no sector do mar, a dixitalización de 14 lonxas.
En canto ao impulso ao sector TIC no 2019, afondouse no desenvolvemento do plan DICO Mindset para impulsar os contidos dixitais en Galicia, leváronse a cabo iniciativas que permitiron aproveitar as oportunidades que ofrece este sector, destacando o proxecto de innovación tecnolóxica para adaptar as emisións da CRTVG ás novas demandas do mercado. Ademais, cabe destacar tamén o apoio á creación dos primeiros Hubs de Innovación Dixital en Galicia.
O catálogo de actuacións do Plan DigiTalent tiña 37 actuacións dispoñibles a principios do curso 2019/20, en colaboración cos axentes do ecosistema dixital, para promover as vocacións científico-tecnolóxicas entre os máis novos e a adaptación aos novos perfís dixitais.