A cultura dixital, a debate na Conversa do CulturaLab deste mércores 25
mércores, 25 de febreiro do 2015
- Xuntanza de traballo do colectivo galego Alg-a
O
Máster de Servizos Culturais da Universidade de Santiago volve este
mes mércores a habilitar un escenario, o das Conversas
do CulturaLab, no que debater sobre fórmulas de facer actividade
produtiva botando man das diferentes (e en moitas ocasións
interconectadas) formas que adopta a cultura. Dito doutro xeito:
trátase de falar arreo de como ser un profesional da creación
artística, gráfica, literaria, musical ou audiovisual (entre outras
linguaxes). Como é lóxico, as novas tecnoloxías da información
andan preto de calquera debate destas características. O encontro
que prepara CulturaLab este 25 non é unha excepción: a cultura
dixital será o eixo temático da nova xeira de conversas. A cita
será este mércores no Museo Provincial de Lugo as 19:00h.
Lembrar
que as Conversas do CulturaLab son unha serie de encontros abertos á
participación que procuran reivindicar a conversa e o debate como
forma de aprendizaxe. Desta volta, logo de tres sesións, achégase a
oportunidade de falar con Manuel Cebral Loureda (Man Hauser),
licenciado en filosofía e coordinador e director do Alg-a
Laboratório, (Valadares, Vigo) centro independente de arte dixital
e cultura libre, no que desenvolven proxectos como programación
creativa, electrónica DIY e circuit bending
entre outros.
A
charla pretende debater en torno á sociedade do espectáculo actual,
“onde a industria do lecer convértese dalgunha maneira nunha cadea
de produción de desexo”, sinalan os organizadores, que tamén
apuntan a que no debate deste mércores farase fincapé no feito de
que dende a cultura dixital “sexa posíbel recuperar ao suxeito
como peza chave na produción e distribución de coñecementos”. E
engaden: “Hai por tanto esa outra cultura dixital que hibrida coas
prácticas tradicionais de reparto de recursos de forma comunal e
será en torno a este fío, polo que Man Hauser guiará a conversa”.
Asemade,
durante a conversa citaranse algúns exemplos de como a cultura
dixital está a transformar espazos como poden ser as artes
escénicas, a través do proxectos de investigación como herm3TICa,
no que colabora o conversador.
Sinalar
que esta charla é a última das catro propostas no marco do
CulturaLab do Máster de Servizos Culturais da USC. O obxectivo dos
responsábeis dos encontros foi convertelos nun lugar de debate
aberto á toda a cidadanía “no que repropoñer e cuestionar o
papel da cultura á hora de enfrontarse aos desafíos que como
sociedade temos por diante”, explican.