A coruñesa Improving Metrics amosará no eShow de Barcelona os seus avances en analítica de datos
xoves, 10 de marzo do 2016
O vindeiro
salón eShow de Barcelona, que se celebra os días 16 e 17 de
marzo, vai ter presenza galega. Máis en detalle, a da empresa
Improving Metrics, que
segundo nos contan, estará presente entre os relatores (empresas e
profesionais de primeira liña internacional do ámbito TIC). Como
lembraremos, Improving Metrics é unha empresa con sede na Coruña
adicada á recolección, procesamento, explotación e análise de
datos sobre o comportamento dos usuarios nos ámbitos dixitais. A
firma, polo tanto, é provedora de servizos integrais de analítica e
de estratexia dixital. No
eShow Barcelona 2016 participará de cheo nas xornadas User Web
Analytics afondando na
fiabilidade da información obtida a través de implantacións de
analística (o que no sector se coñece co acrónimo “QA”).
Improving
Metrics xorde en 2011 co obxectivo de “atender un nicho
de mercado escasamente explotado até ese intre e coa única
intención de satisfacer as necesidades de estratexia, analítica e
data
mining
de todas aquelas empresas interesadas en optimizar os seus recursos”.
A empresa apóiase no convencemento firme do potencial da analítica,
en palabras dos seus responsábeis “a ferramenta que marcará a
diferenza entre as marcas”. Segundo engaden, a súa progresiva
integración no ámbito dos negocios é xa “un alicerce fundamental
no crecemento económico, sustentábel, eficiente e responsábel de
calquera empresa”.
A
dia de hoxe a firma coruñesa atópase en “pleno proceso de medre”
e isto tradúcese na posta en marcha de “múltiples iniciativas”,
moitas delas con capacidade para coñecer en profundidade o que son a
analítica e a estratexia dixital, as métricas (a “gran paixón”
de Improving Metrics) e as súas posibilidades.