A cifra de estudantes da ESO que usan o libro dixital duplicarase na nosa terra o vindeiro curso
martes, 16 de marzo do 2021
O
Goberno galego confirmou hoxe a súa intención de duplicar a cifra
de estudantes da ESO que emprega a día hoxe o libro dixital. Isto
farase efectivo a vindeira semana. Os
detalles da información foron achegados este 16 de marzo polo
conselleiro de Cultura e Educación, Román Rodríguez, na rolda
de prensa de presentación da nova convocatoria de E-Dixgal para o
vindeiro ano académico, na que tamén participou a directora da
Axencia para a Modernización Tecnolóxica de Galicia (AMTEGA), Mar
Pereira.
O
titular do departamento educativo da Xunta explicou que a principal
novidade da convocatoria para o curso 2021/2022 é a extensión do
proxecto aos cursos de 3 e 4º de ESO (ata o momento só se aplica a
5º e 6º de Primaria e a 1 e 2º de ESO). Isto, dixo, “realizarase
de forma automática, se así o desexan, aos centros que xa contan
con libro dixital nesta etapa e que nun só curso dobrarán o número
de alumnos beneficiados”. Asemade, concretou que o vindeiro ano
académico sumarase á iniciativa “un mínimo de 75 novos centros”,
tanto aqueles que “queiran empezar desde cero como outros que xa
estean empregando o libro dixital e desexen amplialo a outra etapa
educativa”. No caso dos que se sumen ao proxecto na etapa de
Secundaria, terán o compromiso de ir estendéndoo progresivamente
ata completar os catro cursos, engadiu.
Román
Rodríguez explicou que, a día de hoxe, participan no E-Dixgal a
metade dos centros públicos que imparten Primaria e Secundaria. Así
mesmo, o conselleiro salientou que con estas novidades ofrécese por
“vez primeira a posibilidade de que un alumno galego estude con
libro dixital durante seis cursos consecutivos”.
Román
Rodríguez enmarcou esta medida “no pulo que imos dar á
dixitalización e a dotación tecnolóxica do ensino coa nova
estratexia Edudixital 2030”, unha folla de ruta que vai integrar
equipamentos, contidos e adquisición de competencias STEM (Ciencia,
Tecnoloxía, Enxeñaría e Matemáticas), e que incorporará a
Intelixencia Artificial para todos os niveis educativos, así como o
deseño de estratexias docentes ou a introdución de novas técnicas
pedagóxicas. “En definitiva, un salto cualitativo na
transformación do ensino cara o dixital”, resumiu o conselleiro.
Pola
súa banda, a directora da Axencia para a Modernización Tecnolóxica
de Galicia (AMTEGA), Mar Pereira, destacou que o proceso de
transformación dixital do ámbito educativo susténtase en cinco
piares fundamentais: as infraestrutura e equipamentos necesarios no
centros; o desenvolvemento de plataformas e ferramentas de
colaboración educativa; a dotación de contidos dixitais mediante
acordos con empresas especializadas e editoriais; o soporte técnico
a docentes e alumnos; e a formación do profesorado.
Mar
Pereira lembrou que a Xunta ten como obxectivo para a extensión do
Libro Dixital (E-Dixgal) nos vindeiros tres anos chegar ao 70 por
cento do alumnado entre 5º de Primaria e 4 da ESO.