A capacidade do noso sector TIC en inclusión dixital, ao descuberto
venres, 23 de novembro do 2012
AMTEGA abriu
este venres a primeira edición da Xornada de Boas Prácticas para a
Inclusión Social, unha actividade do Programa de Voluntariado
Dixital da Xunta para informar ás entidades de acción social das
ferramentas TIC galegas de meirande potencialidade de uso no seu
ámbito. O acto contou coa presenza de Mar Pereira, directora da
Axencia, que salientou a capacidade do noso sector
tecnolóxico-dixital e, en consecuencia, dos seus produtos e
servizos, moitos dos cales (polas súas características de
accesibilidade e de flexibilidade) acáenlle especialmente ás
asociacións, aos organismos ou entidades que estean a traballar no
ben da cidadanía e, con especial referencia ao Programa de
Voluntariado Dixital, no achegamento das TIC á cidadanía en risco
de exclusión.
Segundo fixo saber Pereira, entre os colectivos de meirande risco de
exclusión dixital atópanse as persoas con diversidades funcionais
ou motrices, que na nosa terra alcanzan a cifra de 292.900, o que
supón o 10,5% da poboación, e o colectivo de maiores, que en España
representa un 17,2% da poboación e na nosa Comunidade elévase ao
22,55%. “Unhas cifras que”, segundo a directora da
axencia, “indican a importancia de atender as necesidades
específicas destes colectivos para que a tecnoloxía se converta nun
elemento integrador e non nunha barreira que lles impida ser cidadáns
de pleno dereito na sociedade dixital”.
Na xornada, once firmas TIC galegas amosaron cadansúas aplicacións
dispoñibles no mercado ou en fase de elaboración dirixidas de xeito
específico para persoas con diversidades funcionais, persoas maiores
e dependentes: plataformas para usuarios con parálise cerebral, para
a formación de persoas con discapacidade auditiva, sistemas de
videonterpretación en lingua de signos, solucións para o
diagnóstico e seguimento de persoas autistas, ou sistemas de
monitorización e localización de persoas diagnosticadas de
demencia, son algunhas das 13 propostas que se presentaron.
Tras a presentación representantes das asociacións
tecnolóxico-dixitais galegas AGASOL, AGESTIC, EGANET, INEO e o
Clúster TIC e das organizacións sociais Cruz Vermella, COGAMI,
FAXPG, FEGADACE, ONCE, FEAFES GALICIA , DOWN GALICIA e AUTISMO
GALICIA, participaron nunha mesa redonda sobre a contribución
tecnolóxica ao benestar social.
O Programa de Voluntariado Dixital ten
o obxectivo de estender a oferta pública de alfabetización dixital
a 3.500 persoas maiores e a oito federacións de persoas con
discapacidade. Para cumprir este obxectivo búscase a colaboración
entre as institucións, as empresas do sector TIC e as entidades de
acción social que traballan apoiando aos ditos colectivos en risco
de exclusión. A iniciativa suma tamén a solidariedade individual, a
responsabilidade social das empresas e o aproveitamento das
infraestruturas públicas e hoxe acadouse xa a adhesión de
máis de 200 voluntarios e 74 entidades colaboradoras, entre
concellos, entidades públicas e privadas e organizacións de acción
social.