A canle de podcast de negocios máis seguida do mundo ten orixe galega
xoves, 9 de xaneiro do 2020
A
que sería a canle de podcast sobre negocios máis escoitada do
mundo, a canle Libros para emprendedores, foi posta en marcha
por mans galegas. Máis en concreto, as do enxeñeiro Luis Ramos,
galego residente en México, quen acadou coa súa iniciativa de
comunicacións especializadas no eido empresarial e innovador, posta
en marcha nun principio como “unha simple afección”, a cifra
nada desprezábel de 2 millóns de reproducións mensuais (a través
das dúas canles de emprendemento de Luis Ramos) e unha audiencia
presente en 187 países do mundo. Amais, a súa plataforma de podcast
foi quen de ocupar o posto número 1 da clasificación de ficheiros
sonoros online en español de todas as categorías en 20
países.
A
canle, materializada hai 5 anos, ten a día de hoxe dúas
ramificacións: Libros
para emprendedores e Mentor360.
Segundo lembra o seu artífice, ás devanditas cifras cómpre sumar
outros fitos conseguidos que, na súa opinión, falan ás claras do
extenso da súa audiencia: 38.000 emails persoais de
agradecemento recibidos, máis de 200.000 seareiras e seareiros en
YouTube e máis de 100.000 en Facebook.
A
temática a tratar polos seus contidos é a temática do
emprendemento e a innovación nos mercados, a través de programas
que Ramos define como “útiles e cultos”, un pouco á marxe do
sector do lecer e co engadido extra de presentarse en formatos
innovadores. A iniciativa comezou da súa propia man, cun micrófono
simple e dende o domicilio de seu, concibindo un espazo onde Luis
debulla cada semana as ferramentas e ensinos máis importantes dun
dos máis de 1.000 libros sobre emprendemento que leva lidos. Malia
que os comezos foron relativamente baixos en audiencias, como en
calquera iniciativa específica destas características, moi axiña
comezaron a caer barreiras até que a canle deuse posto na cabeza dos
servizos informativos de negocios máis seguidos de México. O gran
chimpo foi cando acadou popularidade noutros países de Latinoamérica
até acadar a primeira posición na súa área en fala hispana en
máis de dúas ducias de países, e despois a nivel global. Logo,
pasou a ser podcast máis
escoitado en español de calquera categoría.