A campaña Gústame o galego na USC acadou ampla repercusión na Rede
martes, 15 de outubro do 2013
A Universidade de
Santiago fixo reconto da participación xerada pola
campaña Gústame o galego na USC!, levada a cabo in
situ e durante catro xornadas en diferentes recantos dos campus
de Compostela e Lugo (cun posadoiro no que deixaron a súa pegada 800
persoas) e tamén a través do eido dixital. Sobre este ámbito de
actividade, a Universidade de Santiago sinala que a iniciativa para
promover o uso da nosa lingua entre a súa comunidade recibiu
case cincocentas fotografías e o Facebook da campaña tivo unha
participación activa de case seis mil persoas, compartindo e
comentando as devanditas imaxes ou premendo en gústame.
Asemade, acadáronse máis de 64.000 visitas e o número de
afiliacións á
web de Gústame o galego medrou en case mil nas
devanditas datas en que se impulsou a campaña, pasando a case dez
mil.
Os organizadores do
evento informaron que do mesmo xeito que o baile de cifras, é
importante salientar o “clima especial que se xerou arredor dos
photocall, que motivou reflexións, comentarios e charlas
verbo da lingua galega e o seu papel na sociedade e na universidade
galega”.
A finalidade desta
proposta colectiva que promove dende a súa orixe a Coordinadora de
Traballadores/as de Normalización da Lingua é favorecer que persoas
de todo tipo e de todas as idades se impliquen a prol do fomento do
galego en xeral e na USC en particular. “Búscase ademais provocar
a reflexión sobre a necesidade de fomento do galego e achegar tanto
a espazos públicos como á Rede e aos medios mensaxes favorábeis a
prol da normalización lingüística en calquera ámbito facéndoas
visibles a través de persoas concretas”, informa a organización.