A axencia dixital galega Roi Scroll, Premio Cantábrico Excelente
venres, 12 de xuño do 2015
A
axencia dixital galega Roi
Scroll vén de obter un importante recoñecemento ao ter sido
merecedora do Premio
Cantábrico Excelente de Marketing Online que concede a compañía
Suplementos e Monográficos. Como lembraremos, a firma galardoada
está integrada por un equipo de especialistas en mercadotecnia
dixital dirixida a grandes e medianas contas, sendo un dos seus
obxectivos básicos achegar revolucionarios conceptos da promoción
empresarial e comercial en liña. Entre os clientes da empresa atópanse firmas referenciais de
múltiples sectores. Ademais, salienta por ter sido quen de habilitar
unha división formativa centrada nas novas tecnoloxías e nos novos
xeitos de facer mercadotecnia, a Roi
Scroll Academy.
Nun
plano máis concreto, Roi Scroll, con sede en Vigo, centra boa parte
dos seus traballos en integrar, desenvolver e rendibilizar
estratexias en liña que teñan sempre presente o retorno do
investimento, polas súas siglas en inglés ROI (de aí o nome da
empresa).
O
galardón será entregado nunha gala o vindeiro 26 de xuño no hotel
da Reconquista de Oviedo e reunirá a destacadas personalidades da
vida empresarial, económica, social e cultural da beira cantábrica.
Segundo
salienta o xurado dos galardóns, “Roi Scroll emprega as novas
tecnoloxías publicitarias desde unha óptica innovadora sempre para
acadar os mellores resultados para os seus clientes”. Así, engade
o xurado, “a axencia tira proveito das últimas tecnoloxías que
existen no mercado para conseguir aumentar as vendas ou facer medrar
a notoriedade dos seus usuarios na canle dixital, e todo a través de
procesos como a compra de audiencia en tempo real (real time
bidding), accións volver capturar clientes potenciais,
actividades para o mantemento no tempo dos compradores ou campañas
de correo electrónico”. Ademais, lembran os impulsores dos Premios
Cantábrico, Roi Scroll conta cun proxecto propio de formación en
liña, a Roi Scroll Academy, dirixido a directores de mercadotecnia
e novos empresarios que queiran estar ao tanto das últimas novidades
e tecnoloxías do sector. As clases son impartidas por profesionais
da axencia e especialistas en activo que xestionan campañas a
diario.
Por último, Roi
Scroll conta cun blog
de seu, un emprazamento dixital onde o equipo da empresa e outros
profesionais do sector colaboran para crear os mellores contidos
sobre mercadotecnia dixital.