A aventura solidaria de 10fronterasfotofurgo en África, polo miúdo nas redes sociais
venres, 7 de xuño do 2013
As
redes sociais e máis unha furgoneta
Volkswagen Transporter T3 Syncro de 1988 están
a ser estes días os protagonistas dunha
aventura cunha boa meta. Máis polo
miúdo, dun itinerario solidario que se pode seguir, polo miúdo, a
través da Internet (no blog
de seu e nos servizos 2.0 de máis sona, Facebook,
Instagram,
YouTube e
Twitter). E todo grazas á contribución dun
xornalista de 39 anos (José Ramón Puig Koke)
e unha fotógrafa de 31 anos (Claudia Maccioni), que
percorrerán máis de 20.000 quilómetros ao longo de 11 países a
bordo deste vehículo para levar a cabo a 10º FurgoVolkswagen, un
proxecto solidario no que a marca xermana colabora recadando fondos
para apoiar a loita contra o cancro en África a través dos
hospitais Peace & Love.
O seu proxecto, en concreto, chámase
10fronterasfotofurgo.
Emporiso,
a 10º FurgoVolkswagen, na que se insire
este 10fronterasfotofurgo, será o
punto de partida dunha
viaxe que amais ten como obxectivo achegar a situación das zonas
máis descoñecidas dos países do noroeste de África. A aventura
comezará o 28 de xuño en Barcelona e durará tres meses, ao longo
dos cales se percorrerán: Marrocos, Mauritania, Senegal, Gambia,
Guinea-Bisau, Guinea Conakry, Costa do Marfil, Burquina Faso, Gana,
Togo e Benín. Alén disto, Volkswagen organizará un mercadiño
solidario para que todos os seareiros/as das furgos poidan colaborar
e facer achegas económicas por cadansúa furgoneta que se achegue a
facer a foto de familia na concentración. O diñeiro recadado irá
de xeito íntegro a un proxecto en Ghana, a través da ONG Breast
Care Ghana, que centra os seus esforzos
na loita contra o cancro de mama mediante os seus hospitais
Peace&Love. En canto á protagonista destas 10fronteirasfotofurgo -a T3 Syncro-, dicir que é un modelo exclusivo, foron fabricadas
unhas 43.468 unidades en todo o mundo e 5.848 deste modelo en
concreto (panelado). Con todo, esta furgo-aventureira recibiu
algunhas modificacións co gallo de adaptarse ás dificultades da
viaxe: un motor TDI de 90 cv, uns amortecedores Trail
Master de gran capacidade de carga,
faros frontais de longo alcance e dúas bacas portaequipaxes no
teito. No interior, os viaxeiros contarán con cociña de gas,
neveira, calefacción estacionaria, cama dobre (interior e superior),
iluminación por LED’’s, dobre placa solar, illantes térmicos...